स्याङ्जामा पछिल्लो समय फरार रहेका कसूरदारहरु धमाधम पक्राउ पर्न थालेका छन् । सोही क्रममा बिहीबार विभिन्न मुद्दामा अदालतबाट फैसला भई जरिवाना भुक्तान गर्न बाँकी रहेका तीन फरार कसूरदारहरूलाई पक्राउ परेका छन् ।

पक्राउ पर्नेमा भीरकोट नगरपालिका–३ की ५० वर्षीया बुद्धिसरा खत्री रहेकी छन् । उनी ‘खाना लाउन खर्च’ मुद्दामा दोषी ठहर भई तीन हजार ४९० रुपैयाँ जरिवाना तिर्न बाँकी रहेको जनाइएको छ । यस्तै, चापाकोट नगरपालिका–४ का २८ वर्षीय मोहम्मद मुकतार ‘घरेलु हिंसा’ मुद्दामा तीन हजार रुपैयाँ जरिवाना नतिरी फरार रहेका थिए ।

त्यसैगरी, भीरकोट नगरपालिका–८ का आश बहादुर कामी ‘चोरी सम्बन्धी कसूर’ मुद्दामा एक हजार पाँच सय रुपैयाँ जरिवाना भुक्तान गर्न बाँकी रहेको अवस्थामा पक्राउ परेका हुन् ।

पक्राउ परेका फरार कसूरदारहरूलाई जरिवाना असुलका लागि स्याङ्जा जिल्ला अदालतमा उपस्थित गराइएको प्रहरी निरीक्षक कमल नेपालीले जानकारी दिए । उनले अदालतका फैसला कार्यान्वयनलाई निरन्तरता दिने र बाँकी रहेका फरार प्रतिवादीहरूलाई समेत कानुनी दायरामा ल्याउने बताए ।

अदालतको आदेश कार्यान्वयन गर्दै न्यायिक प्रक्रियालाई पूर्णता दिने र सुरक्षित तथा न्यायपूर्ण समाज निर्माणमा सहयोग पुर्‍याउने उद्देश्यले फरारलाई पक्राउ गर्न अप्रेसन नै सञ्चालन गरिएको प्रहरीले जनाएको छ ।