स्याङ्जामा अवैध रूपमा नदीजन्य पदार्थ उत्खनन तथा ओसारपसारमा प्रयोग हुँदै आएका सवारीसाधनहरू प्रहरीले नियन्त्रणमा लिएको छ । प्रहरीले विभिन्न स्थानबाट बालुवा, ढुङ्गा र गिट्टी बोकेका टिपर र ट्याक्टर फेला पारी कारबाही अघि बढाएको हो ।

शुक्रबार वडा प्रहरी कार्यालय वालिङ र प्रहरी चौकी गल्याङबाट खटिएको टोलीले गल्याङ नगरपालिका–३ बल्पुकबाट बालुवा लोड गरिएको टिपर (म.प्र.०३००२ ख १३५९) नियन्त्रणमा लिएको छ । यस्तै, वालिङ नगरपालिका–१ आँधीखोला किनारबाट ढुङ्गा बोकेको ट्याक्टर (ग १ त ४३९७) र वालिङ–११ आम्ले आँधीखोला किनारबाट अर्को ट्याक्टर (लु ४ त ६३४२) समेत नियन्त्रणमा लिइएको प्रहरी निरीक्षक सागर कार्कीले बताए ।

त्यसैगरी, बिहीबार जिल्ला प्रहरी कार्यालय र वडा प्रहरी कार्यालय वालिङको संयुक्त टोलीले वालिङ नगरपालिका–९ कल्लेरी आँधीखोला किनार तथा सुर्कौदी क्षेत्रबाट गिट्टी, बालुवा र ढुङ्गा ओसार्दै गरेका थप छ सवारीसाधनहरू नियन्त्रणमा लिएको प्रहरी निरीक्षक कार्कीले जानकारी दिए । नियन्त्रणमा पर्नेमा ट्याक्टरहरु ग १ त ५६१५, ६२५६, ७३७१, ४०७०, ५२०६ तथा पुतलीबजार नगरपालिका–११ हेलुबाट गिट्टी–बालुवा बोकेको टिपर (ग १ क ३५०२) रहेका छन् ।

नियन्त्रणमा लिइएका सबै सवारीसाधनलाई सम्बन्धित प्रहरी कार्यालयमा राखी आवश्यक अनुसन्धान तथा कानुनी प्रक्रिया अघि बढाइएको जिल्ला प्रहरी कार्यालय स्याङ्जाले जनाएको छ ।