स्याङ्जाको वालिङ नगरपालिका–८ जैसिपंधेरास्थित होटल रोयल अगाडि सिद्धार्थ राजमार्गमा स्कुटर र मोटरसाइकल आपसमा ठोक्किएपछि कुटपिटको अवस्था सिर्जना हुँदा तीन जना घाइते भएका छन् ।

गएराति करिब १२:१० बजे वालिङबाट बयरघारीतर्फ जाँदै गरेको ग १४ प ९४५० नम्बरको स्कुटर र विपरीत दिशाबाट आउँदै गरेको लु ६८ प ५३४२ नम्बरको मोटरसाइकल ठोक्किएपछि दुबै पक्षबीच झगडा भएको थियो । झगडाका क्रममा केही व्यक्ति घाइते भएपछि उनीहरूलाई उपचारका लागि प्राथमिक स्वास्थ्य केन्द्र वालिङ ल्याइएको प्रहरीले जनाएको छ ।

घाइते हुनेमा वालिङ नगरपालिका–८ का ३० वर्षीय अजिम खान रहेका छन् । उनको निधारमा चोट लागेको भए पनि सामान्य उपचारपछि डिस्चार्ज गरिएको छ । यस्तै, भीरकोट नगरपालिका–१ का ३२ वर्षीय अनुप श्रेष्ठको निधार र टाउकोमा चोट लागेपछि थप उपचारका लागि पोखरा रिफर गरिएको छ । उनको गण्डकी मेडिकल कलेजमा उपचार भइरहेको छ । भीरकोट नगरपालिका–१ कै ४० वर्षीय राम सेन ठकुरीको मुखमा चोट लागेको र उनलाई पनि पोखरा रिफर गरी गण्डकी अस्पतालमा उपचार भइरहेको छ ।

यस्तै, कुटपिटमा संलग्न रहेको आरोपमा भीरकोट नगरपालिका–२ का २४ वर्षीय चन्दन केसीलाई प्रहरीले नियन्त्रणमा लिएको सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए ।

दुर्घटनाको कारण र कुटपिट घटनासम्बन्धी विषयमा थप अनुसन्धान भइरहेको प्रहरीले जनाएको छ ।