बैंकिङ कसुर सम्बन्धी मुद्दामा फरार रहेकी एक महिलालाई प्रहरीले पक्राउ गरेको छ । जिल्ला प्रहरी कार्यालय कास्कीमा दर्ता बैंकिङ कसुर मुद्दाका फरार प्रतिवादीको खोजतलासका क्रममा वडा प्रहरी कार्यालय वालिङ, स्याङ्जाबाट खटिएको विशेष अप्रेसन टोलीले उनलाई नियन्त्रणमा लिएको हो ।

पक्राउ पर्नेमा जिल्ला स्याङ्जा साविक मल्याङ्कोट गाविस–३ हाल चापाकोट नगरपालिका–३ बस्ने २९ वर्षीया सुनिता गुरुङ रहेकी छन् । उनलाई सोमबार वालिङ नगरपालिका–१ रामबाच्छा क्षेत्रबाट पक्राउ गरिएको सूचना अधिकारी तथा प्रहरी नायब उपरीक्षक प्रसन्न राज चौधरीले जानकारी दिए ।

पक्राउ परेकी गुरुङलाई आवश्यक कानुनी कारबाहीका लागि सोही दिन जिल्ला प्रहरी कार्यालय कास्कीमा पठाइएको डिएसपी चौधरीले बताए । जिल्ला प्रहरी कार्यालय स्याङ्जाले फरार प्रतिवादीको खोजी कार्यलाई अझ प्रभावकारी बनाउँदै लैजाने जनाएको छ ।