झापा । नेकपा एमालेका अध्यक्ष एवं पूर्वप्रधानमन्त्री केपी ओलीले दलहरूमा देखिएको दोहोरो चरित्रका कारण केही स्टन्टबाजी र पपुलिस्टहरूले परिस्थितिको फाइदा लिन थालेको बताएका छन् ।

आज आफ्नो निर्वाचन क्षेत्र झापा-५ का मतदाता सामु ४२ बुँदे प्रतिबद्धता सार्वजनिक गर्दै उनले स्टन्टबाजी र पपुलिस्टको कुनै दर्शन नीति कार्यक्रम नभई केवल चर्का देखावटी नारा मात्र हुने उल्लेख गरेका छन् ।

चर्का नाराले सर्वसाधारणमा केही भ्रम पार्ने गरेको साथै सामाजिक सञ्जाल र विद्युतीय सञ्चारले गलत र तथ्यहीन कुरा प्रशारण गर्दा केही मानिसका दिमागमा भ्रम पार्न सफल भएको ओलीको भनाइ छ ।

एआईको नियमनमा कानुनको अभावमा व्यापक दुरूपयोग भएको र त्यस्ता कुरा अनियन्त्रित हुँदा कतिपयलाई भ्रमित बनाइएको ओलीले उल्लेख गरेका छ्न् ।

‘सुखी नेपाली समृद्ध नेपाल’ को नाराको विकल्प नरहेको ठहर गर्दै नेकपा (एमाले) जनता र कार्यकर्तामा आधारित पार्टी रहेको र विगतमा भएका राम्रा कामको संरक्षण र अधुरा कामको जिम्मेवारीप्रति उनले प्रतिवद्धता जनाएका छन् ।