पोखरा । सभापति रवि लामिछानेले सहकारीको रकम ठगी गर्दा आफ्नो छोराको विद्यालयको बिल तिर्न नपाएको भन्दै पोखरामा सहकारीपीडित रास्वपा उम्मेद्वारमाथि खनिएका छन् ।

पोखरामा शनिबार आयोजित उम्मेद्वारसँगको संवाद कार्यक्रममा सूर्यदर्शन सहकारीका बचतकर्ता कृष्णप्रसाद जैसीले कास्की निर्वाचन क्षेत्र नम्बर ३ की रास्वपा उम्मेद्वार बिना गुरुङलाई आफ्नो छोराको विद्यालयको बिल थमाएका छन् । आफ्नो बचत हिनामिना हुँदा आफूले पैसा तिर्न नसकेको जैसीको भनाइ थियो ।

उनले बिनालाई विद्यालयको ८० हजार रुपैयाँको बिल दिएका थिए । आफ्नो छोराले वार्षिक परीक्षा नै दिन नपाउने अवस्था रहेको उनको दुःखेसो थियो ।

उम्मेद्वार गुरुङले पार्टी सभापतिलाई उक्त बिल बुझाउने प्रतिक्रिया दिइन् । उनले सभापतिको बचाउमा केही बोलिनन् । संवाद कार्यक्रममा बिनाको प्रस्तुति निकै फितलो थियो । उनलाई प्रश्नको उत्तर सामना गर्न निकै असहज भएको देखिन्थ्यो । ‘मभन्दा अग्रज यहाँ भएर उहाँहरुको अगाडि बोल्न सकिनँ होला । तर, यसको मतलब म केही काम गर्न सक्दिनँ भन्ने होइन,’ उनले आफ्नो बचाउमा बोलिन् । प्रश्नको उत्तर दिने क्रममा उनी बारम्बार अक्मकाएकी थिइन् । उनीमाथि पार्टीलाई ६० लाख रुपैयाँ दिएर टिकट ल्याएको विषय पनि संवादको क्रममा उठेको थियो ।

उनले टिकट पाएकोमा रास्वपाका नेता–कार्यकर्ता नै चकित छन् । कास्की–३ रास्वपाका जिल्ला सभापति यदुनाथ अधिकारीको निर्वाचन क्षेत्र हो । उनले टिकट पाउने चर्चा भइरहँदा बिना उम्मेद्वार बनेपछि कास्कीमा सभापति अधिकारी पक्षधर असन्तुष्ट छन् ।