काठमाडौँ — पैदलयात्रीलाई मुक्का हान्ने कारचालक पक्राउ परेका छन् । काठमाडौंको चप्पल कारखानानजिक एक कारचालकले पैदलयात्रीमाथि कुटपिट गरेको भिडियो सामाजिक सञ्जालमा भाइरल भएपछि प्रहरीले पारस बमलाई पक्राउ गरेको हो ।

अहिले उनलाई ट्राफिक कार्यालय रामशाह पथ लगिएको छ । उनले चप्पल कारखाना अगाडि एक पैदलयात्रीलाई मुक्का हानेका थिए । पैदलयात्रीलाई मुक्का हानेको भिडियो सार्वजनिक भएपछि प्रहरीले अनुसन्धान गरेको थियो ।

जिल्ला प्रहरी परिसर काठमाडौंका एसएसपी रमेश थापाले बमलाई ट्राफिक प्रहरीले नियन्त्रणमा लिएको पुष्टि गरे ।

काठमाडौंको चप्पल कारखाना नजिक एक कार चालकले पैदलयात्रुमाथि कुटपिट गरेको भिडियो सामाजिक सञ्जालमा भाइरल भएको थियो ।

भिडियोमा एकजना अधवैंशे बा.३ च ११०३ नम्बरको जीपबाट झरेर हिँडिरहेका ती वृद्धमाथि गाली गर्दै हातपात गरेका देख्न सकिन्छ।

भाइरल भिडियोका आधारमा घटनास्थल पहिचान गरी अनुसन्धान अगाडि बढाएको ट्राफिक प्रहरीले सम्बन्धित कार चालकलाई नियन्त्रणमा लिएको जनाएको छ ।

‘ए जँडिया के भन्या ओई तैँले,’ भन्दै ती चालकले वृद्धको टाउकोमा मुक्का हानेका थिए । चालकसँगैकी महिला पनि वृद्धलाई गाली गर्दै खनिएकी थिइन् ।