स्याङ्जाको पुतलीबजार नगरपालिकामा वडा स्तरीय ‘मेयर कप पुरुष/महिला भलिबल प्रतियोगिता’ आयोजना हुने भएको छ ।

प्रतियोगिता आगामी चैत ५ गतेदेखि ८ गतेसम्म मालेबगरस्थित कभर्डहल खेलमैदानमा सञ्चालन हुने पुतलीबजार नगर खेलकुद विकास समितिका अध्यक्ष याम प्रसाद गुरुङले जानकारी दिए ।

खेलहरू जिल्ला भलिबल संघ स्याङ्जाको प्राविधिक सहयोगमा नेपाल भलिबल संघको नियमअनुसार सञ्चालन गरिने जनाइएको छ । खेल तालिका चैत ४ गते नगरपालिकाको सभाहलमा प्रशिक्षक वा टोली कप्तानको उपस्थितिमा सार्वजनिक गरिने नगर खेलकुद विकास समितिले जनाएको छ ।

सहभागी टोलीका खेलाडी सम्बन्धित वडामै स्थायी बसोबास गर्ने हुनुपर्ने र टोली दर्ताका बेला नागरिकताको प्रतिलिपी अनिवार्य पेश गर्नुपर्ने व्यवस्था गरिएको छ । साथै टोली विवरण सम्बन्धित वडा अध्यक्षबाट प्रमाणित हुनुपर्ने बताइएको छ । खेलाडीको जर्सी र मोजाको रङ तथा बनावटमा एकरूपता हुनुपर्ने नियम पनि राखिएको छ ।

प्रतियोगितामा पुरुषतर्फ प्रथम हुने टोलीले एक लाख रुपैयाँ, द्वितीयले ६० हजार र तृतीयले ४० हजार रुपैयाँसहित ट्रफी, मेडल र प्रमाणपत्र पुरस्कार प्राप्त गर्नेछन् । त्यस्तै, महिलातर्फ प्रथमलाई ५० हजार, द्वितीयलाई ३० हजार र तृतीयलाई २० हजार रुपैयाँसहित ट्रफी, मेडल र प्रमाणपत्र प्रदान गरिनेछ ।

फाइनल खेलमा उत्कृष्ट खेलाडी, उत्कृष्ट स्पाइकर, ब्लकर, सेटर र डिफेन्डरलाई समेत ट्रफी, मेडल र प्रमाणपत्र प्रदान गरिने आयोजकले जनाएको छ । प्रतियोगितामा सहभागी टोलीको दर्ता शुल्क निःशुल्क राखिएको छ ।