स्याङ्जाको गुलाबी शहर वालिङमा बिहीबारदेखि ‘फर्स्ट एक्स्पो’ पर्व सुरु भएको छ । स्थानीय स्तरमा पर्यटन, व्यापार र मौलिक संस्कृतिको प्रवर्द्धन गर्ने उद्देश्यले आयोजना गरिएको एक्स्पोले नगरमा उत्सवको माहोल थपेको छ ।

एक्स्पोको उद्घाटन गर्दै वालिङ नगरपालिकाका नगर प्रमुख कृष्ण खाँणले यस्ता कार्यक्रमले आन्तरिक पर्यटन विस्तारसँगै स्थानीय उत्पादन र व्यापार प्रवर्द्धनमा टेवा पुग्ने विश्वास व्यक्त गरे । उनले वालिङलाई मनोरञ्जन, व्यापार र पर्यटनको आकर्षक गन्तव्यका रूपमा विकास गर्न यस्ता मेला–महोत्सवहरूले निरन्तर सहयोग पुर्‍याइरहेको बताए ।

नगर प्रमुख खाँणका अनुसार नगरपालिकाले पर्यटन क्षेत्रलाई प्राथमिकतामा राख्दै विभिन्न सम्भावनायुक्त स्थानहरूमा पूर्वाधार निर्माण अघि बढाएको छ । आँधीखोलामा जल पर्यटनको सम्भावना खोज्न आवश्यक अध्ययनसमेत भइसकेको उनले जानकारी दिए । विकासका लागि सरकारी प्रयाससँगै निजी क्षेत्र र नागरिकको सहकार्य अपरिहार्य हुनेमा उनले जोड दिए ।

आयोजक समितिका संयोजक विजय मल्लले आन्तरिक पर्यटन प्रवर्द्धनसँगै वालिङका धार्मिक तथा ऐतिहासिक स्थलहरूको पहिचान उजागर गर्ने उद्देश्यले एक्स्पो आयोजना गरिएको बताए । नेपाली नयाँ वर्षलाई उत्सवका रूपमा मनाउने संस्कार विकासमा पनि यसले सहयोग पुग्ने उनको विश्वास छ ।

एक्स्पोमा स्थानीय उत्पादन, मौलिक खानाका परिकार, कृषि तथा ताजा तरकारी, अदुवा–कफी प्रदर्शनी, सूचना प्रविधि र शैक्षिक सामग्री, अटोमोबाइल्स, हस्तकला तथा पर्यटनसम्बन्धी स्टलहरू राखिएका छन् । साथै विभिन्न सांगीतिक कार्यक्रम, टिकटक प्रतियोगिता, दोहोरी, नृत्य, भजन तथा नौमती बाजा प्रतियोगिता पनि समावेश गरिएको छ । चर्चित ब्याण्डहरूको लाइभ कन्सर्ट मुख्य आकर्षणका रूपमा रहने आयोजकले जनाएको छ ।

इभेन्टका सचिव विक्रम खाँणका अनुसार दैनिक रूपमा विविध सांस्कृतिक तथा प्रतिस्पर्धात्मक कार्यक्रम सञ्चालन गरिनेछ । एक्स्पोबाट उठेको रकम खर्च कटाएर वालिङ खेलमैदान मर्मत तथा राष्ट्रिय महिला लिगमा नगरको सहभागिताका लागि प्रयोग गरिने प्रबन्धक नवराज पौडेलले जानकारी दिए ।

सामान्य दर्शकका लागि प्रवेश शुल्क १०० रुपैयाँ, विद्यार्थीका लागि ७० रुपैयाँ र बेलुकी हुने कन्सर्टका लागि ३०० रुपैयाँ तोकिएको छ ।

बिहान १० बजेदेखि साँझ ७ बजेसम्म प्रतियोगिता तथा सांस्कृतिक कार्यक्रम सञ्चालन गरिनेछ भने साँझ ७ देखि १० बजेसम्म लाइभ कन्सर्ट आयोजना गरिने कार्यक्रम तालिका छ । ओमकार इभेन्ट हबद्वारा आयोजित एक्स्पो वैशाख २ गतेसम्म सञ्चालन हुनेछ ।