स्याङ्जाको बिरुवा गाउँपालिकामा वडा स्तरीय नवौं अध्यक्ष कप खेलकुद प्रतियोगिता हुने भएको छ । गाउँपालिकाको वडा नम्बर १ बिरुवा बजारस्थित खेलमैदानमा आगामी वैशाख ११ देखि १३ गतेसम्म प्रतियोगिता सञ्चालन हुने बताइएको छ ।

गाउँपालिका खेलकुद विकास समितिको आयोजनामा हुने प्रतियोगितामा पुरुष तथा महिला भलिबल, ब्याडमिन्टन, भेट्रान्स भलिबल र पुरुष सर्टपुटका खेलहरू समावेश गरिएको छ ।

पुरुष भलिबलतर्फ विजेताले ८० हजार, उपविजेताले ५५ हजार र तेस्रो हुनेले ३० हजार रुपैयाँ नगदसहित ट्रफी, मेडल र प्रमाणपत्र पाउनेछन् भने महिलातर्फ प्रथम हुनेले ५० हजार, द्वितीयले ३० हजार र तृतीय हुनेले २० हजार रुपैयाँ नगदसहित ट्रफी, मेडल र प्रमाणपत्र प्राप्त गर्नेछन् ।

यसैगरी, ब्याडमिन्टन पुरुषतर्फ प्रथम हुनेले १२ हजार, द्वितीयले ८ हजार र तृतीयले ४ हजार साथै महिलातर्फ प्रथम हुनेले ७ हजार, द्वितीयले ५ हजार र तृतीयले ३ हजार रुपैयाँ नगदसहित ट्रफी, मेडल र प्रमाणपत्र प्राप्त गर्नेछन् ।

यस्तै, भेट्रान्स भलिबलतर्फ विजेताले १५ हजार र उपविजेताले १० हजार रुपैयाँ नगदसहित ट्रफी, मेडल र प्रमाणपत्र प्राप्त गर्नेछन् भने सर्टपुटतर्फ प्रथम, द्वितीय र तृतीय हुनेले क्रमशः ५ हजार, ३ हजार र २ हजार रुपैयाँ नगदसहित ट्रफी, मेडल र प्रमाणपत्र पाउनेछन् ।

जनप्रतिनिधि, कर्मचारी, शिक्षक र स्थानीय खेलकुद समिति बीच मैत्रीपूर्ण भलिबल खेल समेत हुने समितिका सदस्य सचिव गिरिराज रोका मगरले बताए । उनले विजेता हुने टिमलाई १० हजार रुपैयाँ बराबरको पुरस्कार प्रदान गरिने बताए ।