पोखरा । कक्षा १२ मा उत्कृष्ट नतिजाका कारण प्रतिष्ठित पोखराको प्रतिभा माविले एसइईमा यस वर्ष अर्को उत्कृष्टता हाँसिल गरेको छ ।

सोमबार प्रकाशित माध्यमिक शिक्षा परीक्षा (एसइई)–२०८२ मा प्रतिभाबाट ५ जनाले उच्चतम् ४.० जीपीए ल्याउन सफल भएका हुन् ।

३.६ देखि ४.० जिपिएसम्म आउने मात्रै ४७ जना रहेको विद्यालयका प्राचार्य किरण सापकोटाले जानकारी दिए । उच्चतम् ४ जीपीए ल्याउनेमा विकल्प बास्तोला, ग्लोरी राना, लक्षिता राना, प्रशन्न ढकाल र स्वकिार पौडेल रहेका छन् ।

पोखरा पालिखेचोक स्थित प्रतिभा माविले यहाँको उत्कृष्ट विद्यालयको परिचय बनाएको छ । विद्यालय सञ्चालक समिति अध्यक्ष नारायण पौडेलले एसइईमा इतिहास कायम गरेकोमा विद्यालयको सफलताप्रति खुसी व्यक्त गर्दै उत्कृष्ट नतिजासहित उत्तीर्ण सम्पूर्ण विद्यार्थीलाई बधाई एवं सफल र गौरवपूर्ण आगामी शैक्षिक यात्राको शुभकामना दिएका छन् । उनले उत्कृष्ट नतिजाको लागि निकै मेहनतका साथ क्रियाशील विद्यार्थी, शिक्षकशिक्षिका तथा अभिभावकमा हार्दिक धन्यवाद तथा आभार व्यक्त गरे ।

नतिजा प्रकाशनको भोलिपल्टै विद्यालयले अभिभावकका लागि अभिमुखीकरण एवं बधाई ज्ञापन कार्यक्रम आयोजना गरेको हो । विद्यालयका प्राचार्य सापकोटाले कक्षा ११ र १२ का लागि उत्कृष्ट शैक्षिक गन्तव्य प्रतिभा रहेको बताउँदै विद्यालयमा भर्ना खुल्ला भएको जानकारी दिए ।

सर्वोत्कृष्ट विद्यार्थीको रोजाई प्रतिभा रहने गरेको भन्दै प्राचार्य सापकोटाले पोखरा महानगरपालिकाबाट छात्रवृत्तिका लागि प्रक्रियामा सहभागी हुन र प्रतिभा नै पहिलो रोजाईमा राख्न सुझाव पनि दिए । विद्यालयमा हाल नर्सरीदेखि कक्षा १२ सम्म पठनपाठन हुँदै आएको छ ।