पोखराबाट नेपालगञ्ज र भरतपुरका लागि बुद्ध एयरले वर्षाैदेखि गर्दै आएको हवाई उडान रोकिएको छ।

यात्रु संख्या कम भएपछि दुवै गन्तव्यका नियमित उडान रोकेको एयरलाइन्सले बताएको छ। हवाइ इन्धनको मुल्य वृद्धि भएसँगै हवाई भाडा बढेपछि यात्रु कम भएको एयरलाइन्सले बताएको छ।

बुद्ध एयरका पोखरास्थित स्टेशन म्यानेजर गौतम बरालका अनुसार पोखराबाट भरतपुर दैनिक उडान हुँदै आएको थियो। पोखराबाट नेपालगञ्ज भने सातामा तीनदिन (आइतबार, बुधबार र शुक्रबार) उडान हुँदै आएको थियो। ‘हवाई इन्धनको मूल्य वृद्धि भएसँगै भाडा पनि बढ्यो। त्यसपछि यात्रु पनि कम भए,’ बरालले भने, ‘सिजनका बेला पनि यात्रु कम भए। यो बेला भारतीय हवाई यात्रु हुनुपर्ने सिजन भएपनि पर्याप्त यात्रु भएनन।’ बरालले भने ।

पोखरा–भरतपुरको उडानमा यात्रु संख्या घटेर १० जनासम्म झरेका थिए। ‘खर्च नै धान्ने अवस्था रहेन। त्यसपछि उडान रोक्न बाध्य भयौं,’ उनले भने।

नेपालगञ्जको उडान भने एकमहिनाका लागि रोकेको र यात्रु भएमा पुन संचालन गर्ने पनि उनले बताए। नेपालगञ्जबाट पोखरा आउने यात्रुमध्ये धेरैजसो भारतीय पाहुना हुने गरेका थिए। तर, पछिल्लो समय भारतीय पनि कम भएको उनले बताए।