पोखरा । सरकारले सञ्चालनमा चुनौती देखिएपछि आगामी आर्थिक वर्ष २०८३÷८४ देखि पोखरा क्षेत्रीय अन्तर्राष्ट्रिय विमानस्थल र भैरहवास्थित गौतमबुद्ध अन्तर्राष्ट्रिय विमानस्थलको व्यवस्थापन निजी क्षेत्रसँगको सहकार्यमा गर्ने भएको छ ।

अर्थमन्त्री डा. स्वर्णिम वाग्लेले बजेट वक्तव्यमार्फत ती विमानस्थलहरूको प्रभावकारी सञ्चालनका लागि निजी क्षेत्रसँग साझेदारी गरिने घोषणा गरेका हुन् । निजगढ अन्तर्राष्ट्रिय विमानस्थल निर्माणको मोडालिटी पनि आगामी ६ महिनाभित्र टुंगो लगाइने जनाइएको छ ।

सरकारले हवाई पूर्वाधार विस्तारलाई प्राथमिकतामा राख्दै भरतपुर विमानस्थल विस्तार गरी रात्रिकालीन उडान सञ्चालन गर्ने, सुर्खेत विमानस्थल विस्तार गर्ने तथा मुगु र दाङका विमानस्थलको स्तरोन्नति गर्ने योजना अघि सारेको छ । त्रिभुवन अन्तर्राष्ट्रिय विमानस्थल स्तरोन्नतिका लागि १ अर्ब ५३ करोड रुपैयाँ विनियोजन गरिएको छ । आगामी आर्थिक वर्षका लागि संस्कृति तथा पर्यटन क्षेत्रमा ७ अर्ब ३४ करोड रुपैयाँ र नागरिक उड्डयन क्षेत्रमा २ अर्ब ९३ करोड रुपैयाँ बजेट विनियोजन गरिएको सरकारले जनाएको छ ।

पर्यटन प्रवद्र्धनअन्तर्गत लुम्बिनी क्षेत्रको पूर्वाधार विकासका लागि ८३ करोड रुपैयाँ छुट्याइएको छ । तिलौराकोट, देवदह र रामग्रामको विकासलाई प्राथमिकतामा राख्दै जनकपुरलाई ‘विवाह गन्तव्य’ का रूपमा अन्तर्राष्ट्रिय स्तरमा ब्रान्डिङ गरिने भएको छ ।

तिलौराकोट, जनकपुरधाम र गोकर्णेश्वरलाई विश्व सम्पदा सूचीमा सूचीकृत गर्न पहल गरिने बजेटमा उल्लेख छ । मुस्ताङ र मनाङका दुई सय वर्षभन्दा पुराना बौद्ध गुम्बा संरक्षणका लागि विशेष परियोजना सञ्चालन गरिने पनि सरकारको योजना छ ।

पर्यटन विविधीकरणअन्तर्गत पहाडी क्षेत्रमा हिल स्टेसन विकास, ग्रेट हिमालयन ट्रेललगायत रणनीतिक पदमार्गको स्तरोन्नति तथा अन्तर्राष्ट्रिय प्रवद्र्धन गरिने भएको छ । नामकरण नभएका ६ हजार मिटरभन्दा अग्ला हिमालहरूको मौलिक नामकरण गरी अन्तर्राष्ट्रिय बजारमा प्रवद्र्धन गरिने सरकारको योजना छ । स्थानीय पर्यटन प्रवद्र्धनका लागि गण्डकी प्रदेशमा साइकल ट्रेल निर्माण तथा मधेस, कर्णाली र सुदूरपश्चिमका दलित बस्तीमा नमुना होमस्टे सञ्चालन कार्यक्रम पनि बजेटमा समावेश गरिएको छ ।