पोखरा । कास्कीको मादी गाउँपालिका वडा नं. ७, छाचोक स्थित शुभकामना क्लवको आयोजनामा महिलाहरुको महान पर्व हरितालिका तीजको अवसरमा पाँचौ तीज मेला २०७९ हुने भएको छ ।

विगत केही वर्ष कोभिड १९ को कारणले सम्पन्न हुन नसकेको मेला यस पटक विभिन्न खेलकुद तथा सांस्कृतिक कार्यक्रमहरुको आयोजना गरी गर्न लागेको क्लबले जनाएको छ । आगामी भाद्र १४ र १५ गते तीजका दिन राष्ट्रिय तथा स्थानिय कलाकारहरुका साथ मनारञ्जनात्मक कार्यक्रम, वडा स्तररिय भलिवल प्रतियोगिता, तीज गीत प्रतियोगिता, छेलो आदिका सहित आयोजना हुन लागेको कुरा क्लबका अध्यक्ष दिपक शाहीले जानकारी गराए ।

मेला सम्पन्न गराउनको लागि समाजसेवी रामचन्द्र सापकोटाको मूल संयोजकत्वमा मूल आयोजक समिति तथा विभिन्न उपसमितिहरुको गठन गरिएको छ ।

पोखराबाट करिब १० कि.मि. उत्तर पूर्वी भागमा रहेको मादी गाउँपालिका, वडा नं. ७ (साविक सिल्दुजुरे गा.वि.स. वडा नं. ९) कास्की जिल्ला, गण्डकी प्रदेशमा रहेको छ । यो गाउँको पुर्वमा थुमाकोडाँडा, पश्चिममा मौजा, दक्षिणमा कालिकास्थान र उत्तरमा थाक गाउँ र सिक्लेस रहेका छन् । २०७३ सालमा स्थापना भएको यस क्लबले यस क्षेत्रको विकासको लागि विभिन्न सरकारी तथा गैरसरकारी संघसंस्थाहरुसँग सहकार्य गरी विभिन्न कार्यक्रमहरु गर्दै आइरहेको छ ।

विगतका वर्षहरुमा जस्तै संस्कृतिको जगेर्ना र खेलकुदको विकास गर्ने उद्देश्यका साथ पाँचौं तीज मेला २०७९ आयोजना हुने कार्यक्रमहरुमा विजयी टिमहरुलाई उत्कृष्ट पुरस्कारहरुको व्यवस्था गरिएको छ । भलिबलमा बिजयी हुने टिमलाई नगद ३० हजारका साथ प्रमाण पत्र र मेडल, तीज गीत प्रतियोगितामा बिजयी हुनेलाई १० हजार र प्रमाण पत्र प्रदान गरिने क्लबले जनाएको छ ।