काठमाण्डौ। राष्ट्रिय स्वतन्त्र पार्टीका सभापति रवि लामिछानेले प्रतिनिधि सभा बैठकमा आफ्नो पार्टीका सांसदहरुको केही दिन यताको बहस अमर्यादित भएको भन्दै माफी मागेका छन् ।

प्रतिनिधिसभा बैठकमा बोल्दै सभापति लामिछानेले विगत केही दिन यता प्रतिनिधि सभामा भएको छलफलबाट आफू लज्जित भएको बताएका हुन् । उनले प्रतिनिधिसभा बैठकमा राँगा र भैँसीको विषयमा गफ गरेर पाँच वर्ष बिताएमा गोबर बाहेक केही उपलव्धी नपाउने बताए ।

प्रतिनिधि सभा जनताको आशा र भरोसाको केन्द्र भएकाले यस्तो गरिमामय बैठकमा केही दिन यता उठेका विषय र कार्यशैलीले जनतामा निराशा छाउने बताए। उनले मिडियामा आएका समाचारका भरमा सभामा आरोप प्रत्यारोप चलिरहेको बताउँदै कतै हामीलाई पनि यही यस्तै स्वभाव सर्ने त होइन भन्ने अन्यौलमा आफूहरु रहेको प्रतिक्रिया दिए।

त्यसैगरी उनले आगामी दिनमा बजेट बन्नुभन्दा ५ महिना अगाडी नै शिक्षा र स्वास्थ्य नीति कस्तो बनाउने भन्ने सम्बन्धमा बृहत छलफल गरेर साझा अवधारणा बनाउनुपर्नेमा जोड दिए । जन्मसिद्ध नागरिकहरुले नागरिकता पाउनुपर्छ भन्ने पक्षमा आफूहरू रहेको उल्लेख गर्दै नागरिकता विधेयक संसदमा छलफल हुनुपर्ने र छलफलमा भाग लिन पाउनुपर्ने पक्षमा रहेको उनले बताए ।

उनले गोरखा, नुवाकोट र डडेलधुरामा मात्रै विकास बजेट गएको समाचारहरु बाहिरिएको भन्दै यस सम्बन्धमा अर्थमन्त्रीको जवाफको माग पनि गरे।