पर्वतको कुश्मा नगरपालिका–३ दुर्लुङको गौडामुनि भन्ने ठाउँमा गए राति भएको जीप दुर्घटनामा दुई बालबालिकाको मृत्यु भएको छ । १० जना घाइते भएका छन् । ७ वर्षीया बालिका शितल बिककाे पर्वत अस्पताल र ४ वर्षीय बालक प्रिन्स क्षेत्रीकाे पाेखरामा उपचारका क्रममा निधन भएकाे पर्वत प्रहरीले जनाएकाे छ ।

जिल्ला ट्राफिक प्रहरी कार्यालय पर्वतका प्रमुख सुमन निउरेका अनुसार सदरमुकाम कुश्माबाट दुर्लङका लागि छुटेको ग१ज ५२२९ नं. को जीप दुर्घटनामा परेको थियो । दुर्घटनामा परी गम्भीर घाइते भएकी कुश्मा–३ की सात वर्षीया बालिका शीतल विकको टाउको र आँखामा गम्भीर चोट लागेकाे थियाे । उनको उपचारकै क्रममा पर्वत अस्पतालमा मृत्यु भएको हो ।

घाइतेहरु मध्ये कृष्णप्रसाद पाध्या, हिरादेवी मगर, मिनबहादुर क्षेत्री, प्रिन्स क्षेत्री, चन्द्रकला क्षेत्री, अमृत क्षेत्री र भबदत्त शर्मालाई पोखरा रिफर गरिएको थियाे। प्रिन्सकाे उपचारकै क्रममा गण्डकी मेडिकल कलेज पोखरामा ज्यान गएकाे हाे ।

दुर्घटनामा परी घाइते भएकाहरु मध्ये शौरभ विक, शान्ति विक, अम्मर विक, निशान परियारको अवस्था सामान्य रहेको छ । उनीहरुको पर्वत अस्पतालमा उपचार भएको छ ।

उकालो बाटोमा चढ्दै गरेको जीप अचानक अनियन्त्रित भई सडकबाट करिब ३०–३५ मिटर तल खसेको थियो । जीपका चालक प्रहरीको नियन्त्रणमा रहेको र जीप घटनास्थलमा सवारीधनीको जिम्मामा रहेको प्रहरी निरीक्षक प्रकाश रावतले जानकारी दिएका छन् । जीपकाे अकस्मात ब्रेक फेल भएकाे चालकले बताएका छन्  ।