काँग्रेस नेता सुरेन्द्रराज पाण्डे नेतृत्वकाे गण्डकी प्रदेश सरकारकाे  सय दिन पूरा भएको छ । पाण्डेले शनिबार सय दिनको उपलब्धि सार्वजनिक गरे । पत्रकार सम्मेलन गरेर मुख्यमन्त्री पाण्डेले ४६ बुँदे उपलब्धि सार्वजनिक गरेका हुन् ।

बजेट ल्याउनुलाई नै उनले आफ्नो सय दिने कार्यकालको मुख्य उपलब्धि मानेका छन् । मुख्यमन्त्री पाण्डेले सय दिनमा गरेको मुख्य कामको पहिलो बुदाँमै बजेट पारितलाई समेटेका छन् । मुख्यमन्त्री पाण्डेले विगतको भन्दा उत्कृष्ट बजेट ल्याएको समेत दाबी गरे ।  प्रदेशको नीति कार्यक्रम, बजेट, जनताको जनजिविका र प्रदेशको अधिकारका सवालमा केन्द्रित भएको बताए ।

मुख्यमन्त्री पाण्डेले अर्को महत्वपूर्ण मुख्यमन्त्रीहरुको भेलालाई प्रस्तुत गरे । गण्डकी प्रदेशले असार १५ गते प्रदेशको हक, अधिकार र कानुन निर्माणको सवालमा मजबुत बनाउन प्रधानमन्त्री पुष्पकमल दाहाल ‘प्रचण्ड’ अन्तर प्रदेश मुख्यमन्त्री भेला गरेको थियो ।

प्रदेश सरकारले मृगौलाका बिरामीलाई पालो कुनुपर्ने झन्झटमुक्त अवस्थालाई शुन्यमा झार्न संक्रामक तथा सरुवा रोग अस्पताल कास्कीमा २५ शय्याको डायलिसिस केन्द्र सञ्चालन गरेको छ । २२ नयाँ डायलिसिस मेसिन खरिद गरेको छ । स्याङजा, पर्वत, लमजुङ, तनहुँ र नवलपुरमा २/२ वटा मेसिनबाट सेवा सुरु गर्ने तयारी भइरहेको मुख्यमन्त्री पाण्डेले जानकारी दिए । उनका अनुसार १५ नयाँ डायलिसिस मेसिन खरिद गर्ने कार्यविधि अन्तिम चरणमा छ ।

गण्डकी-सरकारको-१००-दिन