बझाङ । बझाङमा गएको भूकम्पमा परी एक जनाको मृत्यु भएको छ ।

हिजो दिउँसो टिमुर टिप्न गाउँनजिकैको जङ्गलमा गएकी जयपृथ्वी नगरपालिका–११ ओखल गाउँकी ४५ वर्षकी गुनदेवी धामीको मृत्यु भएको हो ।

प्रहरीका अनुसार पहिरोमा च्यापिएको अवस्थामा धामीको शव फेला परेको थियो ।

भूकम्पबाट बझाङमा मात्रै १३ जना घाइते भएका छन् । भूकम्पले सदरमुकाम चैनपुरसहित आसपास गाउँका केही घर, विद्यालय र वडा कार्यालय गरी अहिलेसम्म एक सय ६० भन्दा धेरै भौतिक संरचनामा क्षति पुगेको तथ्याङ्क छ ।

बझाङमा केन्द्रविन्दु भएर हिजो मंगलबार पटक पटक भूकम्प गएको थियो ।

राष्ट्रिय भूकम्प मापन तथा अनुसन्धान केन्द्रका अनुसार सबैभन्दा ठूलो धक्का दिउँसो ३ बजेर ६ मिनेटमा ६.३ रेक्टर स्केलको गएको थियो ।
त्यसअघि पहिलो पटक २ बजेर ४० मिनेटमा ५.३ रेक्टर स्केलको भूकम्प गएको थियो ।

केन्द्रका अनुसार ३ बजेर ६ मिनेटको मेनसकपछि ४ रेक्टरमाथिका ३–४ वटा परकम्प गएका छन् भने ४ रेक्टरभन्दा कमका थुप्रै परकम्प गएका छन् ।

३ बजेर ४५ मिनेट र ४ बजेर २८ मिनेटमा ४.१ रेक्टर स्केलका तथा ४ बजेर ३१ मिनेटमा ४.३ रेक्टर स्केलको तथा बेलुकी ५ बजेर १९ मिनेट र ५ बजेर ३८ मिनेटमा ५ रेक्टरको भूकम्प गएको केन्द्रले जनाएको छ ।