पोखरा लेकसाइडको डिहिकोपाटनमा मार्फा थकाली भान्छा घर सञ्चालनमा आएको छ । पोखराको गैह्रापाटनमा ‘स्टेशन द फुड क्लब’ सञ्चालन गर्दै आएका आयुष श्रेष्ठले ‘मार्फा थकाली बाइ स्टेशन’ सञ्चालनमा ल्याएका हुन् ।

आफ्नै भवनबाट संचालनमा आएको थकाली भान्सा घरमा दुई करोड लगानी भएको निलिमा हिराचन श्रेष्ठले बताइन् । आज विजयादशमीको घटस्थापनाको दिनबाट औपचारिक रुपमा सञ्चालनमा ल्याइएको मार्फा थकालीमा नाम मात्रैको थकाली नभई स्वादसहितको थकाली खाना ग्राहकले पाउनेछन् ।

रेष्टुरेन्टमा आवश्यक पर्ने फापर, आलु, दाल लगायत मार्फाबाट ल्याइनेछ । यसका अलावा पोखरा तथा यस आसपासका अर्गानिक खानेकुरा स्वाद दिने प्रयासमा रहेको आयुषले बताए । उनले फेवाफाँटको जेठोबुढो, जुम्लाका मार्सी लगायतको ग्राहकको माग अनुसारको खाना समेत उपलब्ध गराउने  बताए ।

मार्फामा नै उत्पादन भएको फापर, आलु र दालको स्वाद ग्राहकलाई उपलब्ध गराउने लक्ष्य छ । यसका अलावा पोखरा तथा यस आसपासका अर्गानिक खानेकुरा समेत पाइनेछ । ग्राहकले आफूले रोजेको चामलको खाना खान ३० मिनेट कुर्नुपर्ने उनले बताए ।

मार्फा थकालीमा ग्राहकका लागि रेट पनि सस्तो नै राखिएको छ । बजारका अन्य थकाली रेष्टुरेण्ट भन्दा सुलभ दरमा खाना खान ग्राहकले पाउनेछन् । सादा थकाली खानाको ३ सय ५० रुपैयाँ, चिकेन थकाली खानाको ५ सय रुपैयाँ र मटन थकाली खानाको ६ सय रुपैयाँ तिर्नुपर्नेछ । थकाली खानासँगै थकाली ब्रेकफास्टको आइटम समेत उपलब्ध गराइने आयुशले जानकारी गराए । जसका लागि दुई सय रुपैयाँदेखि माथिको मुल्य निर्धारण गरिएको छ ।

एक पटकमा १ सय जना सम्मलाई खाना खुवाउन सक्ने क्षमता भएकाले भोक मेटाउने थलो मार्फा थकाली बन्न सक्ने विश्वास निलिमा हिराचन श्रेष्ठको छ । मार्फा थकालीमा १० जनाले रोजगारी पाएका छन् ।

स्टेशन द फुड क्लब जत्तिकै सफलता मार्फा थकालीलाई मिल्नेमा उनीहरु आशावादी देखिन्छन् । मन्दीका बेलामा पनि आयुष निलिमाले समस्याबाट नभागी समस्यासँग जुधेर नै व्यवसायिक सफलता हासिल गर्न सकिन्छ भन्ने सन्देश प्रवाह गरेका छन् ।