पोखरा । यस वर्षको ‘पुलिस ब्याटन’ गण्डकी प्रदेश प्रहरी कार्यालयले जितेको छ । केन्द्रीय मूल्याङ्कन समितिले गरेको कार्यदक्षता मूल्याङ्कनमा गण्डकी प्रदेश प्रहरी कार्यालय उत्कृष्ट भएको हो ।

६८ औँ प्रहरी दिवसको अवसरमा प्रहरी प्रधान कार्यालयले गण्डकी प्रदेश प्रहरी कार्यालयलाई ‘प्रहरी ब्याटन’ प्रदान गरेको हो । प्रधानमन्त्री पुष्पकमल दाहाल ‘प्रचण्ड’ले गण्डकी प्रदेश प्रहरी कार्यालयका डिआइजी बुद्धिराज गुरुङलाई अवार्ड प्रदान गरेका छन् ।

मूल्याङ्कन समितिको सिफारिसको आधारमा जिल्ला प्रहरी कार्यालय सुनसरी उत्कृष्ट जिल्ला घोषित भएको छ । इलाकातर्फ इलाका प्रहरी कार्यालय बुटवल उत्कृष्ट भएको छ । इप्रका बुटवलका डिएसपी दान बहादुर थापालाई अवार्डेड भएका छन् ।

चौकीतर्फ इलामको श्रीअन्तु प्रहरी चौकी उत्कृष्ट हुन सफल भएको छ । गणतर्फ बाँकेस्थित खजुरीमा अवस्थित प्रहरी गण उत्कृष्ट भएको छ । तालिम केन्द्रतर्फ दुधौली तालिम केन्द्र र नेपाल प्रहरी प्रदेश कार्यालय जनकपुर उत्कृष्ट भएका छन् ।

प्रहरी अतिरिक्त महानिरीक्षक सन्दीप भण्डारी र डिआइजी यज्ञ विनोद पोखरेल सहितको मूल्याङ्कन टोलीले देशभरका प्रहरी कार्यालयमा पुगेर ‘कार्यदक्षता मूल्याङ्कन’ गरेका हुन् ।