नेपाली काँग्रेस, कास्कीका सभापति किशोरदत्त बरालले सदस्य गंगाधर पराजुलीलाई पदमुक्त गरेका छन् । तर, पराजुलीले आफै समितिमा बस्न नचाहेको प्रतिक्रिया दिएका छन् । सभापतिमा निर्वाचित भएपछि बराल स्वयंले पराजुलीलाई सदस्यमा मनोनित गरेका थिए ।

अमेरिकाको चार महिने भ्रमण पूरा गरी पराजुली आज राति काठमाण्डौ उत्रँदैछन् । नेपाल आइनपुग्दै गत मंसिर १० गते सभापति बरालले पराजुलीलाई पदमुक्त गरिएको पत्र पठाएका हुन् ।

पत्रमा लेखिएको छ – ‘२०७८ चैत्र ४ गते विधान अनुसार कास्कीको सदस्य पदमा गरिएको तपाईंको मनोनयनलाई विधान अनुसार सभापतिमा अन्तरनिहित वैधानिक व्यवस्था अनुसार २०८० मंसिर १० गतेबाट लागु हुने गरी जिम्मेवारी मुक्त गरिएको छ ।’

पराजुलीले पदबाट मुक्त गरेकोमा कुनै दुःख नभएको बताएका छन् । तपाईंलाई किन पदमुक्त गरियो ? भन्ने प्रश्नमा लामो लिखित प्रतिक्रिया यस्तो छः

‘सभापतिको कार्यशैली अनि भाषण । सामाजिक सन्जालमा एउटा कुरा भन्ने तर व्यवहारमा त्यो नगर्ने प्रवृत्ति साथै जिल्ला कार्य समितिको नियमित वा अन्य बैठक लामो समयदेखि गर्न नसक्ने, महिला संघलाई विवाद र विभाजनतर्फ लैजाने, नेविसंघको विवाद मिलाउन कुनै चासो नदिने र पार्टी संगठन सुदृढ़ गर्ने कुरा भन्दा पनि व्यक्तिगत ईच्छा र चाहना अनुसार जिल्ला चलाउन खोजेपछि मैले ५/७ महिना अगाडि नै मलाई जिल्ला सदस्यबाट हटाएर अरु साथीहरुलाई राख्नु भनेको थिएँ सार्वजनिक रुपमा । तर, यतिबेला मात्र मेरो भाइबरमा यो पत्र खुसुक्क पठाएको देखेँ । म नेपाल बाहिर गएपछि नियमित वा अन्य कुनै बैठक समेत हुन सकेनन् । एक पटक ८ जना, एक पटक १५ जना मात्र उपस्थित भएर कोरम समेत पुगेन । यस्तो अवस्था आउनुमा सभापतिजी नै प्रमुख कारण हुन् । तसर्थ मलाई जिल्ला सदस्यबाट मुक्त गरेकोमा कुनै दुःख छैन ।’

उनले थपेका छन् – ‘मेरो अर्को जिम्मेवारी पनि छ, नेपाली काँग्रेस केन्द्रीय प्रचार विभागको सदस्यको रुपमा । तर, त्यो नहुँदा नै मैले सभापतिलाई कि त कार्यशैली सुधार गर्नू, कि लिडरशीपमा मेच्योरिटी देखाउनू र संगठनको हित हुने गरी निर्णय गर्नू भन्दै आएको थिएँ । तर, सुधार गर्ने छाँट नदेखेपछि मलाई यो जिम्मेवारी मेरो ईच्छा र चाहनाले दिएको पनि हैन र तपाईको चाहनाले दिएको जिम्मेवारीबाट मुक्त गरिदिनू भनेको थिएँ ।’