पोखरा । ‘म बिना कसै कसैलाई मुस्किल छ पोखरामा..’ का सर्जक शीतल गिरी गीतकार प्रतिष्ठान नेपालको अध्यक्षमा चयन भएका छन् । शनिबार पोखरामा भएको प्रतिष्ठानको दोस्रो अधिवेशनले गिरीको अध्यक्षतामा ११ सदस्यीय कार्यसमिति सर्वसम्मत रुपमा चयन गरेको हो ।

उपाध्यक्षमा अनुराग अधिकारी, सचिवमा रुपिन्द्र प्रभावी, कोषाध्यक्षमा लाल कार्की अञ्जान, सह–सचिवमा विर्सना बस्नेत रहेका छन् । सदस्यमा राजाराम पौडेल, जीवन मित्र पण्डित, सावित्री गिरी, रेशम रचक, हरिमाया पराजुली र आर्दश पोखरेल रहेका छन् ।

डिल्लीराम अर्यालको संयोजकत्वमा गठित तीन सदस्यीय निर्वाचन मण्डलले आवश्यक प्रक्रिया पुरा गरेर नयाँ नेतृत्व सहतिको टीम घोषणा गरेको थियो । निर्वाचन मण्डलको सदस्यमा पुष्पराज पौडेल र विक्रम पौडेल रहेका थिए ।

नवनिर्वाचित अध्यक्ष गिरीले प्रतिष्ठानले गर्दै आएका कामको सहित नयाँ केही कार्यक्रम गर्ने योजना आफूले बनाएको खुलाए । सबैको साथ सहयोगमा आफ्नो कार्यकाल सफल बन्ने उनको विश्वास छ ।

उनले केही नयाँ कार्यक्रम आफ्नो कार्यकालमा सुरु गर्ने समेत बताए । ‘विभिन्न कार्यक्रम अगाडि बढाउन पाए भनेर पहिलेबाट सोचेका केही कार्यक्रम छन्ति, नका साथ केही नयाँ शैलीका कार्यक्रम समेत गर्नेछौं’ उनले प्रतिवद्धता गरे ।

निवर्तमान अध्यक्ष हरिहर खनियाले नयाँ नेतृत्व सहतिको टीमले अस अगाडि गरेका कामको निरन्तरता सहित केही रचनात्मक कार्यहरु गर्दै यसको आर्कषण बढाउने उपेक्षा गरे ।

वरिष्ठ लोक गायिका हरिदेवी कोइरालाले नयाँ निर्वाचित टीमलाई सफल कार्यकालको शुभकामना दिइन् । प्रतिष्ठानले सञ्चालन गर्ने कार्यक्रममा आफ्नो तर्फबाट सदैव साथ रहने उनको प्रतिवद्धता थियो ।

यसअगाडि अधिवेशनको उद्घाटन कवि, गीतकार तथा संस्कृतीकर्मी तीर्थ श्रेष्ठले गरेका थिए । श्रेष्ठले गीतको मुख्य व्यक्ति गीतकार हुँदाहुँदैपनि उनीहरु छायाँमा पर्ने गरेको गुनासो गरे । गीतकार प्रतिष्ठानले गीत वाचन कार्यक्रमको थालनी सुरु गर्नु राम्रो कुरा भएको बताएका उनले गीत हुनको लागि रेकर्ड हुनुपर्छ भन्ने नरहेको प्रष्ट पारे ।

पैसाको बलले समेत गीतकार बन्ने चलन देखिएकोमा उनको चिन्ता थियो । ‘गीतको बजारीकरण गर्दै आम पाठकका माझमा पुर्‍याउने काम हामीले गर्न सकेका छैनौं’ श्रेष्ठले भने ।

सोही कार्यक्रम मार्फत गीतकार शीतल कादम्बिनीलाई श्रष्टा सम्मान अर्पण गरियो । गीतकार प्रतिष्ठान नेपालको स्थापना २०७७ सालमा भएको हो ।