पोखरा । लायन्स क्लब अफ अन्तर्राष्ट्रिय डिस्ट्रिक्ट ‘जे’ नेपालले दोस्रो राष्ट्रिय महाधिवेशन पोखरामा गर्न लागेको छ ।

महिलामात्र सदस्य भएको संसार भरीको पहिलो क्लब लायन्स क्लब अफ पोखरा गण्डकीको आतिथ्यतामा ३ चैत २०८० मा पोखरा सभागृहमा महाधिवेशन गर्न लागिएको मुल आयोजक कमिटिका संयोजक पूजन शाक्यले जानकारी दिइन् ।

महाधिवेशनमा १२ जिल्लाका ५ डिष्ट्रिक्ट अन्तर्गतका क्लबका करिब ६ हजार प्रतिनिधिले भाग लिनेछन् । ‘महाधिवेशनलाई भव्य र सभ्य रुपमा सम्पन्न गर्न लायन्सका सदस्यहरु उत्साहितका साथ लागेका छन्,’ संयोजक शाक्यले भनिन्, ‘महाधिवेशनलाई सफल पार्न सम्पूर्ण लायन्स तथा लियो क्लब लगायत सबै संघ, संस्थाको सहयोग रहेको छ ।’ उनले लायन्स महाधिवेशनले पोखराको पर्यटन प्रर्वद्धनमा सहयोग पुग्ने बताइन् ।

पर्यटन प्रवर्द्धनको लक्ष्यसहित गर्न लागिएको महाधिवेशनबाट नेपाललाई विश्वसामु चिनाउन सहयोग पुग्ने संयोजक शाक्यको दाबी छ । उनले पर्यटन क्षेत्रका सबै संघ संस्थाले आकर्षक छुट सहितको प्याकेज घोषणा गरेको बताइन् ।

महाधिवेशनमा सहभागिताको लागि दर्ता शुल्क २ हजार ५ सय कायम गरिएको छ । लियो क्लबका लागि १ हजार दर्ता शुल्क तोकिएको छ । महाधिवेशन गर्न २५ देखि ३० सम्म लाखसम्म खर्च लाग्ने अनुमान गरिएको उनले जानकारी दिइन् । महाधिवशेनले नयाँ नेतृत्व चयनसमेत गर्ने छ ।

निवर्तमान डिस्ट्रिक्ट गभर्नर ध्रुव श्रेष्ठले महिला क्लबहरुको व्यवस्थापनमा हुने महाधिवेशन भव्य र सभ्य हुने बताए । अहिले लायन्स क्लब अफ अन्तर्राष्ट्रिय डिस्ट्रिक जे नेपालको गभर्नरमा हरिप्रसाद मरहठ्ठा छन् ।

फर्स्ट भाइस गभर्नर मिलन थापाले सबै विधि र प्रक्रियाबाट नेतृत्व चयन हुने जानकारी दिइन् । लायन्स क्लब अफ पोखरा गण्डकी अध्यक्ष बबी शेरचन, पूर्व अध्यक्ष शारदा पराजुली, भगवती रेग्मी लगायतले लायन्सको महाधिवेशन तयारीबारे बोलेका थिए ।