पोखरा। नविनम गायिका सुनिता थापाको नयाँ गीत र म्युजिक भिडिओ ‘जुनी जुनीलाई’ सार्वजनिक भएको छ । गीतमा सुनिता तथा राजेन्द्र बाजुरालीको स्वर रहेको छ ।

सुनिताको यो पहिलो गीत हो । यसअघि उनले केही ट्र्याकहरुमा गीत रेकर्ड गर्दै सामाजिक सन्जालमा पोस्ट गर्दै आइरहेकी थिइन् ।

अष्ट्रेलियामा बसोबास गर्ने सुनिता गीत संगीतमा निकै समय बिताउने गर्छिन् । पहिलो प्रयासबाट आफूलाई हौसला मिलेको अनुभव सुनाउँदै हरेक पटक नेपाल आउँदा एउटा गीत रेकर्ड गर्ने मनसाय रहेको बताइन् ।

म्युजिक भिडिओमा गायिका सुनिता र खिम लामिछाने काजीको अभिनय छ । काजी पोखरामा रहेर सामाजिक कार्य गर्नुका साथै फोटोग्राफी र साहित्यमा रुची राख्छन् । गीतको लेखन र संगीत टेक नारायण चापागाइँले गरेका छन् भने एरेञ्ज राजेन्द्र बाजुरालीको छ ।

युवाहरुमा हुने प्रेम तथा रोमान्सलाई गीतमा उनेर संगीतवद्ध गरिएको छ भने सोही अनुसारको कथामा आधारित रहेर निर्देशक तारानाथ आचार्यले निर्देशन गरेका छन् ।

अनिस खड्काले छायाङ्कन गरेका छन् । गीतमा मोडल रहेका खिम काजीले पोखरा फेवातालको सौदर्यलाई उजागार गर्ने उदेश्यले लकेसाइड गौरीघाट परिसरमा रहेको शिवजीको मन्दिर तथा अन्य लेकसाइड वरपरका दृश्यहरुलाई भिडियो समावेश गरेको बताए । पोखरामै रहेका महेन्द्र थापाले म्युजिक भिडियोको निर्माणदेखि सार्वजनिक गर्ने काम गरेका हुन् ।