पोखरा । नेकपा एमालेनिकट अनेरास्ववियु जनप्रिय बहुमुखी क्याम्पसले क्याम्पसस्तरीय खुल्ला निबन्ध लेखन प्रतियोगिता गरेको छ । तीन वटा शीर्षकमा अंग्रेजी र नेपाली भाषामा लेख्न सकिने गरी सोमबार प्रतियोगिता गरेको हो ।

प्रतियोगितामा क्याम्पसमा अध्ययनरत १६ जना विद्यार्थी सहभागी थिए । शैक्षिक क्षेत्रको सुधारमा विद्यार्थी संगठनको भूमिका, गणतन्त्रभित्र विद्यार्थी आन्दोलनको भूमिका र उच्च शिक्षाको खोजी कि विदेश पलायन ? मध्ये एउटा शीर्षकमा लेख्न सकिने गरेर प्रतियोगिता गरिएको थियो ।

प्रतियोगिताको आगामी १८ फागुन, शुक्रबार घोषणा गरिने क्याम्पस कमिटी सचिव सचिन अधिकारीले जानकारी दिए । पुरस्कार नगद वा शैक्षिक सामग्री के हुन्छ भन्ने गोप्य राखिएको छ ।

सोमबार आयोजित प्रतियोगिताका प्रमुख अतिथि अनेरास्ववियु कास्की अध्यक्ष सन्तोष पोखरेलले देशका हरेक आन्दोलनमा विद्यार्थी संगठनको भूमिका महत्वपूर्ण रहेको बताए । उनले उच्च शिक्षा र रोजगारीको खोजीमा युवाहरु विदेशीनु दुःखद भएको बताए ।

अनेरास्ववियु क्याम्पस कमिटी अध्यक्ष आविष्कार केसीको अध्यक्षतामा भएको कार्यक्रममा जिल्ला उपाध्यक्ष शिव पराजुली, सदस्य दुर्गा पौडेल, आदेश प्रधान, दिपेश पौडेल, पर्वत जिल्ला कमिटी सचिवालय सदस्य प्रसन्न रिजाललगायत सहभागी थिए ।