पोखरा । राजनीतिक दाउपेचको फाइदा उठाउँदै गण्डकी प्रदेशका सदस्य राजीव गुरुङ उर्फ दीपक मनाङे फेरि मन्त्री बन्ने भएका छन् । मुख्यमन्त्री सुरेन्द्रराज पाण्डेले सत्ता टिकाई राख्नको लागि मनाङेलाई मन्त्रिपरिषदमा समेट्न लागेका हुन् ।

यसअघि उनै मुख्यमन्त्री पाण्डले कुनै हालतमा मन्त्री नबनाउने अडान लिँदा मन्त्री हुनकै लागि नेकपा एस प्रवेश गरेका मनाङे मन्त्री बन्न पाएनन् । सत्ता साझेदार समाजवादीका एक्ला सांसद मनाङेलाई कुनै हालतमा मन्त्री नबनाउने अडान लिएका मुख्यमन्त्री पाण्डेले अहिले सत्ता टिकाउनै लागि मनाङेलाई मन्त्री बनाउन लागेका हुन् ।

राजनीतिक समिकरण परिवर्तन भएसँगै मनाङेलाई स्वतन्त्र हुन फाइदा हुने भएपछि पुनः स्वतन्त्र हैसियतका लागि आइतबार निवदेन दिएका थिए । नयाँ बनेको गठबन्धनले सरकार गठन गर्न बहुमतका लागि प्रयास गरिरहँदा मनाङे काँग्रेस नेतृत्व सरकारमा सामेल हुन लागेका हुन् ।

गण्डकीमा अहिलेसम्म राप्रपा निर्णायक देखिएको छ । तर, मनाङेले पनि मुख्यमन्त्री पाण्डेलाई साथ दिएको अवस्था र नेपाल समाजवादी पार्टीका नेता तथा माओवादीको चुनाव चिन्हबाट सांसद बनेका फडिन्द्र देवकोटाले छुट्टै दल पाउनुपर्ने दाबी गरिरहेका बेला उनको सरकार जोगिने सम्भावना पनि उत्तिकै देखिन्छ ।

मनाङे र फडिन्द्र काँग्रेससँग उभिएको अवस्थामा राप्रपा जुन कित्तामा उभिन्छ, उसैको सरकार चल्छ र मध्यावधि रोकिन्छ । सत्ता गठबन्धनले राप्रपालाई सामेल नगरेका कारण दुवैतर्फ बराबरी अवस्थामा राप्रपाले काँग्रेस नेतृत्व मानेर यही सरकार निरन्तर चल्न सक्ने अवस्था पनि छ ।