पोखरा । नेपाली भाषा शिक्षक परिषद्,कास्की, नेपालले शनिबार प्रश्नपत्र निर्माण तथा उत्तरपुस्तिका परीक्षणसम्बन्धी कार्यशाला आयोजना गरेको छ ।

कार्यशालामा मावि तहमा डा. बोधराज ढकाल र डा. यामनाथ तिमिल्सिना, आधारभूत तह (६-८)मा डोलराज अर्याल र शिवहरि सुवेदी र आधारभूत तह (४-५)मा माधवशरण उपाध्याय र लोकचन्द्र खनालले नेपाली भाषाका शिक्षकहरूलाई प्रश्नपत्र निर्माण र उत्तरपुस्तिका परीक्षण सिपबारे सहजीकरण गरे ।

समारोहमा प्रदेश परीक्षा व्यवस्थापन कार्यालय गण्डकी प्रदेश प्रमुख लक्ष्मण देवकोटाले भाषा जोगाउने दायित्व शिक्षकहरुको काँधमा रहेको जनाए । ‘नेपाली भाषामाथि चौतर्फी आक्रमण भएको अवस्थामा हामी संवेदनशील हुनुपर्छ । विद्यार्थीमा नेपाली भाषाप्रति मोह जोगाउन आवश्यक छ,’ उनले भने । कार्यालयले गर्नुपर्ने काम भाषा परिषद्ले गरेको भन्दै उनले धन्यवाद दिए ।

मदरल्यान्ड माविका प्रधानाध्यापक नारायण बरालले प्रश्नपत्रको निर्माण स्तरीय हुनुपर्ने र प्रश्नहरुले विद्यार्थीको स्तर र भाषाको ज्ञान बढाउन सघाउनुपर्नेमा जोड दिए । आयोजक परिषद्का अध्यक्ष डिल्लीराम अर्यालले नेपाली भाषा बचाउने मुख्य दायित्व नेपाली शिक्षकहरुकै रहेको औंल्याउँदै त्यस कार्यमा उच्च मनोबलका साथ लाग्न आग्रह गरे ।

संस्था महासचिव एवं कार्यक्रम संयोजक शिवहरि सुवेदीले विगतमा गरेका कार्यशालाका प्रभावकारिताको अनुभवका आधारमा शिक्षककै मागका आधारमा कार्यक्रम राखिएको जनाए ।

कार्यशालाका सहभागी रेन्बो एकेडेमी होम्स माविका नेपाली शिक्षकद्वय दुर्गा थापा र स्मिता खाँडले यस्ता कार्यशाला प्रश्नपत्र निर्माण र उत्तरपुस्तिका परीक्षणलाई सहज बनाउने अपेक्षा सुनाए ।

प्रतिभा माविका शिक्षकद्वय अमृता गुरुङ र अमृता जिसीले कार्यशालाले शिक्षण र पेसाप्रति थप जिम्मेवार बनाएको उल्लेख गरे । कार्यक्रममा १५० भन्दा बढी विद्यालयका २५० भन्दा बढी नेपाली भाषाका शिक्षकशिक्षिकाको सहभागिता रहेको थियो ।

कार्यक्रममा नेपाल गणित समाज शिक्षा परिषद् गण्डकी प्रदेश अध्यक्ष डा.त्रिभुवन शर्मा, परिषद्का वरिष्ठ उपाध्यक्ष सूर्यप्रसाद लम्साल लगायतले बोलेका थिए ।