स्याङ्जाको भिरकोट नगरपालिका स्थित बयरघारी खेलमैदानमा खुल्ला पुरुष भलिबल प्रतियोगिता शुरु भएको छ ।

बुद्ध जयन्ती तथा क्लबको वार्षिकोत्सबको अवसरमा भिरकोट खेलमैदानमा आयोजित रमाइलो मेलाको मुख्य आकर्षणको रुपमा युवाहरु लक्षित खुल्ला पुरुष भलिबल प्रतियोगिता शुरु भएको हो ।

बयरघारी पिस युथ क्लबले `समाज र राष्ट्र विकासको लागि युवा एकता, अनुशासन, विकास र गतिशीलता´ भन्ने मुल नारासहित खेलकुद, कला र संस्कृतिको जगेर्ना गर्ने मुख्य उद्देशका साथ भिरकोट खेलमैदानमा तेस्रो खुल्ला पुरुष भलिबल प्रतियोगिता तथा रमाइलो मेला आयोजना गरिएको क्लबका अध्यक्ष दिल बहादुर मगर(सागर)ले जानकारी दिए ।

लिग सिस्टम अनुसार खेलाइने उक्त भलिबल प्रतियोगितामा ट्रफी, मेडल र प्रमाणपत्र सहित विजेताले एक लाख १० हजार रुपियाँ, उपविजेताले ६५ हजार , तृतीयले ३५ हजार र सान्त्वनाले २५ हजार प्राप्त गर्नेछन् ।

यसैगरी, प्रतियोगितामा विभिन्न विधा अन्तर्गत उत्कृष्ट खेलाडी, स्पाइकर, सेटर, कुइकर, ब्लकर, डिफेन्डर र सर्भरलाई ट्रफी, मेडल एवं प्रमाणपत्र प्रदान गरिने खेल संयोजक सुरज खाँण ठकुरीले बताए ।

यहि २० गतेसम्म चल्ने उक्त प्रतियोगिताको उद्घाटन गर्दै भिरकोट नगरप्रमुख गोविन्द कुमार कर्माचार्यले खेल अनुशासन र सभ्य तरिकाले संचालन गर्न आग्रह गरेका थिए । उनले खेलका माध्यमबाट देशको शिर उच्च बनाउन सकिने जनाउँदै भिरकोटमा आयोजित प्रतियोगिता देशकै उदाहरणीय प्रतियोगिताको रुपमा चिनाउन सबै लागि पर्नुपर्ने बताएका थिए ।