विश्वकै सर्वोच्च शिखर सगरमाथा हिमालमा स्याङ्जा आँधिखोला गाउँपालिकाको झण्डा फहरिएको छ ।

स्याङ्जा आँधिखोला गाउँपालिका -२ चिलाउनेबासका ३६ वर्षीय सुरज पौडेलले सगरमाथा आरोहणमा सफलता मिलेसङ्गै आँधिखोले सभ्यता बोकेको लोगो अंकित झण्डा फहराएका हुन् ।

उनी शेर्पा एक्स्ट्रिम प्रा.लि. मार्फत गत ३० चैतमा सगरमाथा आरोहणका लागि प्रस्थान गरेका थिए । सशस्त्र प्रहरी बल नेपालमा सेवारत प्रहरी निरीक्षक उनले जेठ ७ गते बिहान १० बजेर २० मिनेटमा हिमाल आरोहणमा सफलता पाएपछी सगरमाथाको चुचुरोमा पुगेर जन्मथलो आँधिखोला गाउँपालिकाले पालिकाका महत्त्वपूर्ण स्थान समेटेर बनाएको लोगो अंकित झण्डा र कर्मक्षेत्र सशस्त्र प्रहरी बलको झण्डा प्रदर्शन गरेका थिए ।

सगरमाथा आरोहण गर्ने पौडेल आँधिखोलाका पहिलो व्यक्ति हुन् भने जिल्लाको पनि संभवत पहिलो हुन सक्ने अनुमान गरिएको छ । त्यस्तै, सशस्त्र प्रहरीबाट पनि पहिलो पटक सगरमाथा आरोहण गर्ने व्यक्ति पौडेल रहेको सशस्त्र प्रहरी बल नेपालले जनाएको छ ।

बुबा शरद पौडेल र आमा रिता पौडेलका छोरा सुरजले २०६७ सालमा खुला प्रतिस्पर्धाबाट सशस्त्र प्रहरी निरीक्षक पदमा प्रवेश गरेका थिए भने उनी सेवामा प्रवेश गर्नुअघिबाटै पदयात्रामा रुचि राख्थे ।