युथ थिङ्कर्स सोसाइटी पोखराले गरेको गण्डकी प्रदेश स्तरीय संयुक्त राष्ट्रसंघको नमूना महासभा सम्पन्न भएको छ । शुक्रबारबाट सुरु भएको नमूना महासभा जेठ १३ गतेसम्म चलेको थियो ।

महासभामा विश्व पारिस्थितिकीयतन्त्र र जैविक विविधतामा विश्वव्यापी वन डढेलोको बढ्दो खतरालाई सम्बोधन तथा विकासशील राष्ट्रहरूमा वित्तीय समावेशीकरणको लागि फिनटेक र डिजिटल वित्त प्रवर्द्धन सम्बन्धमा बहस भएको छ ।

गण्डकी प्रदेशका विभिन्न ११ जिल्लाबाट आएका युवा प्रतिनिधि बहसमा सहभागी भएका थिए । युथ थिङ्कर्स सोसाइटी पोखराले राष्ट्रसंघको नमूना महासभा आयोजना गरेर बहस गराएको थियो । जसमा सहभागी प्रतिनिधिले विभिन्न देशको प्रतिनिधित्वको अभ्यास गरेका थिए ।

महासभामा डेलिगेटहरु आफ्नो देशका समस्यामा केन्द्रित भएका थिए । महासभामा सबै सहभागी गरी ५० जना युवा सहभागीहरु थिए ।

उद्घाटन समारोहमा प्रमुख अतिथि गण्डकी प्रदेशका मुख्यमन्त्री खगराज अधिकारी र विशिष्ट अतिथि गण्डकी प्रदेश सामाजिक विकास तथा स्वास्थ्य मन्त्री सीता कुमारी सुन्दास सहभागी थिए ।

नमूना महासभामा विश्वव्यापी समस्याहरूको सम्भावित समाधानका उपाय पनि प्रस्तुत भएको थियो ।

विशेष विशेषज्ञ विषय सत्रमा विश्व पारिस्थितिकीयतन्त्र र जैविक विविधतामा विश्वव्यापी वनडढेलोको बढ्दो खतरालाई सम्बोधन गर्न गण्डकी प्रदेश वन मन्त्रालयका उप-सचिव मेघराज पौडल रहेका थिए ।

विकासशील राष्ट्रहरूमा वित्तीय समावेशीकरणको लागि फिनटेक र डिजिटल वित्त प्रवर्द्धन सम्बन्धमा पोखरा विश्वविद्यालयका सहायक प्राध्यापक उज्वल अधिकारी थिए । उक्त अभ्यासमा विषय वस्तुमा केन्द्रित भएर भोटिङ गर्दा नीतिगत, कुटनीति, अन्तराष्ट्रिय सम्बन्धलाई मध्यनजर गर्नुपर्ने उल्लेख थियो ।

युथ थिङ्कर्स सोसाइटी पोखराका अध्यक्ष दीपा अधिकारीले डेलिगेटहरुलाई सौहार्दपूर्ण वातावरणमा कार्यक्रममा सहभागी हुन अनुरोध गरेकी थिइन् ।

अधिकारीको नेतृत्वमा गण्डकी प्रदेश स्तरीय संयुक्त राष्ट्रसंघको नमूना महासभा सम्पन्न भएको हो । उनले नमुना सभा एउटा सिकाइ भएकाले यसको भरपुर प्रयोग गर्न अनुरोधसमेत गरिन् ।

समापन समारोहमा प्रमुख अतिथि गण्डकी प्रदेश नीति तथा योजना आयोगका उपाध्यक्ष डा. श्रीकान्त शर्मा खतिवडा थिए । उनले युवाहरुलाई प्रोत्साहन गर्न यस खाले कार्यक्रमको भूमिका हुने बताए ।