पोखरा । गण्डकी प्रदेशको नीति तथा योजना आयोग उपाध्यक्षमा डा. कृष्णचन्द्र देवकोटा नियुक्त भएका छन् । देवकोटालाई मुख्यमन्त्री सुरेन्द्रराज पाण्डेले बिहीबारै शपथ राएका छन् । उनी पाण्डेको पहिलो कार्यकालमा समेत उपाध्यक्ष थिए ।

दक्षिण कोरियाको क्योङपुक नेसनल युनिभर्सिटीबाट भूगर्भशास्त्रमा पिएचडी गरेका देवकोटा हाल ग्लोबल इन्टिच्युट फर इन्टर डिसिप्लिनरी स्डडिज (जिआइइएस) मा रिसर्च फेलो हुन् । उनी गोरखाको पालुङटार नगरपालिका ३ निवासी हुन् ।

विकास योजना, विपद् व्यवस्थापनका साथै विपद मैत्री विकासका ज्ञाता डा. देवकोटा कम उमेरमा पिएचडी गर्नेमा पर्छन् । उनले २९ वर्षको उमेरमा पिएचडी गरेका हुन् । केही समय कोरिया सरकारकै मातहतमा रहेका काम गरेका उनी स्विस कम्पनीमा विपद व्यवस्थापन विज्ञका रुपमा आबद्ध थिए ।

गण्डकी प्रदेशको समृद्धिका लागि विपतमैत्री विकास योजना निर्माण गरेर कृषि, पर्यटन, जलस्रोत र पूर्वाधारलाई प्राथमिकतामा राखेर आफूले यसअघि काम गरेको र त्यसै अनुसार अगाडि बढ्ने प्रतिबद्धता उनले जनाएका छन् ।

असार १ गते प्रदेश सरकारले संसदमा बजेट पेस गर्नुपर्छ । त्यसअघि नीति तथा कार्यक्रम प्रस्तुत गर्नुपर्छ । नीति तथा योजना आयोगले बजेट अगावै मध्यमकालीन खर्च संरचना पनि तयार गर्नुपर्छ । यी सबै कामका लागि नीति तथा योजना आयोगमा नियुक्तिलाई मुख्यमन्त्रीले प्राथमिकतामा राखेका हुन् ।