जिल्ला प्रशासन कार्यालय स्याङ्जा र इलाका प्रशासन कार्यालय वालिङ्ले जेष्ठ नागरिकलाई प्राथमिकतामा राखी राष्ट्रिय परिचयपत्र सम्बन्धी सेवा प्रवाह गर्ने भएको छ ।

सामाजिक सुरक्षा भत्ता वितरणसङ्ग राष्ट्रिय परिचयपत्रलाई आवद्ध गरिएपछी प्रशासन कार्यालयमा बढ्न गएको चापले सेवा लिन कठिनाई उत्पन्न भएपछि राष्ट्रिय परिचयपत्र आवेदन तथा वितरण कार्यलाई छिटोछरितो र प्रभावकारी बनाउनका लागि हप्ताका विभिन्न बारहरुमा प्रत्येक पालिकाका जेष्ठ नागरिकलाई प्राथमिकतामा राखी सेवा प्रवाह गर्ने व्यवस्था मिलाइएको स्याङ्जाका सहायक प्रमुख जिल्ला अधिकारी दीपक पौडेलले जानकारी दिए ।

उक्त सेवा अन्तर्गत जिल्ला प्रशासन कार्यालय स्याङ्जामा आइतबार आँधीखोला गाउँपालिका, सोमबार फेदिखोला गाउँपालिका, मंगलबार पुतलीबजार नगरपालिका, बुधबार अर्जुनचौपारी गाउँपालिका, बिहिवार हरिनास गाउँपालिका र शुक्रबार बिरुवा गाउँपालिकाका जेष्ठ नागरिकलाई प्राथमिकतामा राखी सेवा प्रवाह गरिने सहायक प्रजिअ पौडेल बताए ।

यस्तै, इलाका प्रशासन कार्यालय वालिङ्मा आइतबार वालिङ् नगरपालिका, सोमबार भीरकोट नगरपालिका, मंगलबार गल्याङ नगरपालिका, बुधबार चापाकोट नगरपालिका, बिहीवार कालीगण्डकी गाउँपालिका र शुक्रबार वालिङ् नगरपालिकाका जेष्ठ नागरिकालाई प्राथमिकतामा राखी सेवा प्रवाह गरिने सहायक प्रजिअ पौडेलले जानकारी दिए ।

सहायक प्रजिअ पौडेलले जेष्ठ नागरिकको हकमा सोही अनुसारको आवश्यक सूचना प्रवाह गरि सहयोग गरिदिन जिल्ला स्थित सबै स्थानीय तहलाई अनुरोध गरेको बताए ।