स्याङ्जाको अर्जुनचौपारी गाउँपालिका स्थित घट्टेखोलामा शिलान्यासको पाँच महिनामै मोटरेबल पुल निर्माण भएको छ ।

अर्जुनचौपारी सदरमुकामबाट छोटो दुरीमा रहेको देशकै पहिलो पर्यटकीय ग्रामीण गाउँ सिरुवारी जाने बाटोमा पर्ने उक्त मोटरेबल पुल निर्माण थालेको पाँच महिनामै सम्पन्न भएको हो ।

दुई पालिका अर्जुनचौपारी र आँधीखोला हुँदै पर्वत जिल्ला जोड्ने उक्त मोटरेबल पुल संघीय सरकारको ५० लाख र बाँकी पालिकाको बजेटमा निर्माण भएको हो । पुल निर्माणका लागि टेन्डर रकममा २७ प्रतिशत छाडेर एक करोड १६ लाख ५४ हजार ६९ रुपियाँ ४५ पैसामा अँगेरे भँगेरे निर्माण सेवा कम्पनीले निर्माण कार्य सम्पन्न गरेको हो । गत पौष १२ गते एक वर्ष भित्रमा निर्माण सम्पन्न गर्नेगरी सम्झौता गरेकोमा निर्माण कम्पनीले फागुन १ गतेबाट नै काम सुरु गरेको थियो ।

पालिकाका सव-इन्जिनियर सन्दिप बोगटीले १० मिटर लम्बाई रहेको पुल ५ मिटर चौडा रहेको जानकारी दिए । पुल निर्माणको मुख्य काम सकिसकेको र दुई छेउको पहुँच मार्ग निर्माण गर्ने काम बाँकी रहेको बोगटीले बताए ।

युवा निर्माण व्यवसायी युवराज गुरुङले सेवाग्राहीको आवश्यकतालाई मध्यनजर गर्दै पुल छिटो नै बनाएको बताए । पुल नहुँदा बर्सादको समयमा जोखिमपूर्ण र लामो यात्रा गर्नुपर्ने बाध्यता रहेको थियो ।

पुल नहुँदा चार वर्ष पहिला शहरेखोला पुल शिलान्यासमा आएका तत्कालीन भौतिक पुर्वाधार मन्त्री रघुवीर महासेठको गाडी समेत बगाएको थियो ।