लगातारको अविरल वर्षाका कारण स्याङ्जाका धेरैजसो क्षेत्रमा पहिरो गएको छ । पहिरोले सिद्धार्थ राजमार्ग अवरुद्ध गरेको छ भने घर बगाउँदा क्षति समेत भएको छ ।

वर्षाका कारण आएको पहिरोले स्याङ्जाको भिरकोट नगरपालिका -४ छाङ्छाङ्दीस्थित सिद्धार्थ राजमार्गमा पहिरो जाँदा सडक पुर्ण रुपमा अवरुद्ध भएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।

भारी वर्षाका कारण वालिङ् नगरपालिका -८ ओम शान्ति, वालिङ् नगरपालिका -१० मोदिखोलामा साथै गल्याङ नगरपालिका -८ चिउरी र वडा नं. ११ स्थित मुड्किल्ला समेतमा सिद्धार्थ राजमार्ग अवरुद्ध भएको डिएसपी रानाले बताए । उनले लगातार भारी मात्रामा वर्षा भइरहेकोले सडक सुचारू गर्न कठिनाई भएतापनी प्रहरी टोलि खटेर राजमार्ग खुलाउन प्रयास भइरहेको बताए ।

सिद्धार्थ राजमार्गसङ्गै भित्री सडकखण्डमा समेत पहिरोका कारण यातायात अवरुद्ध भएका छन् भने अवरुद्ध सडकका कारण यात्रुहरु बीच बाटोमा अलपत्र परेका छन् ।

त्यस्तै, स्याङ्जाको बिरुवा गाउँपालिका -६ स्याङ्दी स्थितमा पहिरोले एक घर पुर्दा ठूलो मात्रामा क्षति पुगेको छ र अर्को एक घर जोखिममा रहेको छ भने हालसम्म कुनै मानवीय क्षति नभएको प्रहरीले जनाएको छ ।