पोखरा । गुरुकुल विद्यासदन, नयाँबजारमा कक्षा ११ का नवआगन्तुक विद्यार्थीलाई शनिबार कक्षा १२ का विद्यार्थीले स्वागत गरेका छन् । त्यस अवसरमा गुरुकुलमै किन पढ्ने, त्यहाँ अध्ययन गर्दा अपनाउनुपर्ने अनुशासन एवं विविध पक्षबारेमा अभिमुखीकरण भयो ।

पोखरा ९ का वडाध्यक्ष दीपेन्द्र मर्सानीले गुरुकुलले फड्को मार्दै अगाडि बढिरहेको चर्चा गर्दै शिक्षा, खेलकुद तथा सांस्कृतिक क्षेत्रमा पनि विद्यालयले योगदान दिइरहेको औँल्याए । उनले विद्यार्थीको भविष्य समुज्ज्वल बनाउन गुरुकुलले भूमिका खेल्ने विश्वास व्यक्त गर्दै लगनशील भई पठनपाठनमा लाग्न विद्यार्थीलाई सुझाव दिए ।

हिसान केन्द्रीय उपाध्यक्ष बाबुराम पन्तले गुरुकुल असल शैक्षिक संस्थाका रुपमा विकास भइरहेको धारणा राख्दै अभिभावक तथा विद्यार्थीको रोजाइमा पर्दै गइरहेको बताए ।

विद्यालय अध्यक्ष रवि कार्कीले पठनपाठन अलावा विद्यार्थीको प्रतिभा पहिचान गर्न विद्यालय प्रयासरत् रहेको दाबी गर्दै विद्यालयले अभिभावकको भरोसा टुट्न नदिने बताए । उनले कमजोर तथा मध्यम विद्यार्थीलाई विषयवस्तुमा अब्बल बनाउनु विद्यालयको पहिलो कर्तव्य भएको जनाउँदै विद्यार्थीलाई अनुशासनमा रहन सुझाव दिए ।

प्रधानाध्यापक नारायण आचार्य, सहप्रधानाध्यापक भुवन सुवेदी, प्लस टु संयोजक वसन्तकुमार श्रेष्ठ लगायतले गुरुकुल नाममात्र नभई सार्थक गुरुकुल भएको दाबी गरे । उनीहरुले नवआगन्तुक विद्यार्थीले सही विद्यालय रोजेको भन्दै विद्यार्थीको भविष्य उज्ज्वल रहन औँल्याए ।

त्यस अवसरमा कलाकार प्रकाश दुतराज, विद्यार्थी सुप्रिया मल्ल ढकुरी, विवश श्रेष्ठ, सृष्टि गुरुङ लगायतका समूहले विभिन्न प्रस्तुति राखे । त्यस्तै विभिन्न प्रतियोगिताका विजेता विद्यार्थीलाई सम्मान गरियो । कार्यक्रममा नेवारी समुदायको लाखेनाच समेत प्रदर्शन भयो । कक्षा १२ का विद्यार्थी रीया श्रेष्ठको अध्यक्षतामा भएको उक्त कार्यक्रममा सहप्रधानाध्यापक सुवेदीले स्वागत तथा प्लस टु संयोजक श्रेष्ठ, विद्यार्थी प्रसन्न आचार्य र सुवर्ण राईले संयुक्त रुपमा कार्यक्रम सञ्चालन गरे ।