स्याङ्जामा नै पहिलोपटक भब्य रुपमा कविता महोत्सव `राष्ट्रिय खुल्ला कविता प्रतियोगिता -२०८१´ हुने भएको छ ।

यहि श्रावण ३१ गते स्याङ्जा पुतलीबजार नगरपालिका -१ स्थित सिटीहलमा पुष्प-चन्द्र ट्रस्टका संस्थापक चन्द्रलक्ष्मी श्रेष्ठको प्रथम वार्षिक पुण्यतिथिको अवसरमा नेपाल प्रज्ञा प्रतिष्ठानका प्रथम नागरिक कुलपति कविवर स्व. केदारमान व्यथित र निष्ठाका पर्याय स्व. पुष्पमान श्रेष्ठको सम्झनामा भव्य कविता महोत्सव एवं खुल्ला कविता प्रतियोगिता गर्न लागिएको हो ।

पुष्प-चन्द्र ट्रस्ट स्याङ्जाको आयोजना तथा पुतलीबजार प्रज्ञा प्रतिष्ठान र स्याङ्जा साहित्य प्रतिष्ठानको सह-आयोजनामा `नेपाली भाषा, कला, संस्कृती, साहित्य र शैक्षिक उन्नयनमा हाम्रो अनुष्ठान´ भन्ने मूल नाराका साथ महोत्सव एवं प्रतियोगिता गर्न लागिएको हो । कविता मार्फत साहित्यिक उन्नयन गरी स्याङ्जा जिल्लालाई साहित्यिक जिल्लाको पहिचान बनाउने सो महोत्सव तथा प्रतियोगिताको उद्देश्य रहेको छ ।

कविता महोत्सव तथा प्रतियोगितामा सहभागी हुनका लागि श्रावण १५ गतेसम्म तोकिएको समयसीमामा अमेरिका, बेलायत र मलेशिया सहित नेपालका ६ प्रदेश, ४८ जिल्लाबाट प्राप्त भएका १९९ कवितामध्ये निर्णायक मण्डलले पाँच प्रदेश र १४ जिल्लाका २० कवितालाई उत्कृष्ट कविताको रुपमा वाचनको लागि छनौट गरेको शुक्रबार पत्रकार सम्मेलनमार्फत कविता महोत्सव एवं प्रतियोगिताका संयोजक अनन्त कुमार श्रेष्ठले जानकारी दिए ।

आगामी श्रावण ३१ गते हुने कविता महोत्सव समारोहमा उत्कृष्ट कविताका रूपमा छनौट भएका २० प्रतिस्पर्धीले स्वयं कविता वाचन गर्ने र निर्णायक मण्डलले उत्कृष्ट तीन कविता छनौट गर्ने र भव्य समारोहका बीच सम्पन्न हुने महोत्सवमा कविता प्रतियोगिताका उत्कृष्टलाई १५ हजार ५५५, द्धितीयलाई ११ हजार १११, तृतीयलाई ७ हजार ७७७ र सान्त्वना दुई जनालाई ३ हजार ३३३ रुपियाँ नगदसहित ट्रफी र प्रमाणपत्रले पुरस्कृत गरिने श्रेष्ठले बताए ।

उक्त कविता महोत्सव तथा प्रतियोगिता सङ्गै पुष्प-चन्द्र ट्रस्टले विद्यार्थी सहयोग कार्यक्रम अन्तर्गत पुतलीबजार नगरपालिकाका ४ वटा सामुदायिक विद्यालयका पाँच सय विद्यार्थीलाई शैक्षिक सामाग्री वितरण गरिने जनाएको छ ।

यस्तै, ट्रस्टले पुष्प-चन्द्र स्मृति सेवा पुरस्कार २०८१ बाट फेदिखोला गाउँपालिकामा रहेको अमोर सेवा नेपाल(बालगृह) र एसईई परिक्षा २०८१ मा जिपिए ४.० ल्याई स्याङ्जा जिल्ला उत्कृष्ट भएका सुसान मरासिनीलाई सम्मान गर्ने पत्रकार सम्मेलनमा बताइएको छ ।

कार्यक्रममा नेवा: परम्पराको लाखे लगायत सांस्कृतिक, विभिन्न जातजातिका भेषभूषा, झाँकी प्रदर्शन सहित साहित्यिक सोभायात्रा गरिने र कार्यक्रममा अनुमानित १० लाख खर्च हुने आयोजकले जनाएको छ ।