जिल्लाभर तीज पर्व मौलिक रुपमा मनाउन जिल्ला प्रशासन कार्यालय स्याङ्जाले आग्रह गरेको छ ।

जिल्ला प्रशासन कार्यालय स्याङ्जाले मंगलबार सूचना जारी गर्दै हर्षोल्लासका साथ मनाइने हरितालिका तीज पर्व तडकभडकसहितका अत्यन्त खर्चिला कार्यक्रम नगरी मौलिक रुपमा मनाउन अनुरोध गरेको हो ।

महिलाहरूले महान चाड मानिने तीज पर्व परम्परागत मौलिक चरित्र र सामाजिक-सांस्कृतिक मान्यतालाई ओझेलमा पार्ने गरी अनावश्यक रूपमा खर्चिलो तथा भड्किलो हुँदै गएको, देखासिकीमा परिवारले धान्न मुस्किल पर्ने गरी फजुल खर्च गर्ने, प्रस्तुतीमा मौलिकता र व्यक्तिगत रचनाले प्राथमिकता पाउन छाडेको जस्ता गुनासा हुने भएकाले तीज पर्व मनाउँदा समाजको परम्परागत मौलिकता, सांस्कृतिक परम्परा र गौरव कायम राख्दै पर्व मनाउन प्रशासनले सूचनामा उल्लेख गरेको छ ।

स्थानीय प्रतिभाको प्रस्फुटन हुने वातावरण प्रवर्द्धन गर्दै महिला / सामाजिक सशक्तीकरण, लैंगिक समानता र सामाजिक सद्भाव बढाउने गरी स्वस्थ र शान्तिपूर्ण रूपमा हार्दिकतापूर्वक ढंगले मनाउन सूचनामार्फत आग्रह गरिएको छ ।