पोखरा । गण्डकी सरकारमा छैटौं पटक मन्त्री पदमा रहेका राजीव गुरुङ (दीपक मनाङे)ले दिएको राजीनामा स्वीकृत भएको छ ।

आज एमालेका ४ मन्त्रीहरुले सपथ गरे पश्चात् मनाङेले सचिवालयमार्फत् पेश गरेको राजीनामा मुख्यमन्त्री सुरेन्द्रराज पाण्डेले स्वीकृत गरेका हुन् ।

सोमबार मन्त्रिपरिषद विस्तार गर्दा मुख्यमन्त्री पाण्डेले मनाङेलाई भौतिक पूर्वाधार मन्त्रालयबाट हटाएर वन मन्त्रालयको जिम्मा दिएका थिए । गतिलो मन्त्रालयबाट निकालेर वन मन्त्रालय सुम्पेको भन्दै उनले पद छाडेका हुन् ।

मुख्यमन्त्रीको निर्णयबाट असन्तुष्ट मनाङेले अपरान्ह स्वकीय सचिव सन्तोष अधिकारीमार्फत राजीनामा पठाएका थिए ।

मुख्यमन्त्री पाण्डेले सत्ता साझेदार नेकपा एमालेको असन्तुष्टिका बाबजुद आफूले मनाङेलाई मन्त्रिपरिषदमै राखेको तर उनले आफैं राजीनामा गरेका कारण स्वीकृत गरेको बताएका छन् । काँग्रेसको भागमा मन्त्री पदमा निरन्तरता पाएका मनाङेले राजीनामा दिएपछि अब काँग्रेसकै एक जना सांसदले अवसर पाउने भएका छन् ।

सपथ ग्रहणकै बेला आफूलाई बन मन्त्रालयमा सरुवा गरेको थाहा भएपछि मनाङे झोक्किएर निस्केका थिए । उनी पदभार ग्रहण गर्न गएनन् ।
मुख्यमन्त्री तथा मन्त्रिपरिषद कार्यालय स्रोतका अनुसार मनाङेले सरकार पुनर्गठन हुँदा सामाजिक विकास, युवा तथा खेलकुद मन्त्रालय माग गरेका थिए। तर उक्त मन्त्रालय कांग्रेस सांसद विन्दुकुमार थापाले पाए। त्यसपछि नै मनाङे असन्तुष्ट बनेको बताइन्छ ।

तीन पटक खेलकुद मन्त्रालय सम्हालेका मनाङेलाई पाण्डेले नै सत्ता जोगाउन भौतिक पूर्वाधार जस्तो मालदार मन्त्रालय सुम्पेका थिए । त्यसपछि खगराज अधिकारीले पनि सोहि मन्त्रालयमा राखे भने पाण्डे पुनः मुख्यमन्त्री बन्दासमेत उक्त मन्त्रालय नै सुम्पेका थिए ।

मुख्यमन्त्री पाण्डेले माओवादीको चुनाव चिह्नबाट जितेका नेपाल समाजवादी पार्टीका फणिन्द्र देवकोटा र स्वतन्त्र सांसद राजीव गुरुङलाई दुःखमा साथ दिएको भन्दै यथावत् राखेका थिए ।

एमालेले देवकोटा र गुरुङलाई मन्त्री बनाउँदा कांग्रेसकै कोटा दिन भनेको थियो । तर पाण्डेले दुई मन्त्रालय फुटाएर एकातिर एमालेलाई मनाएका थिए । अर्कातिर मनाङे र देवकोटालाई पनि साथमै राख्न चाहेका थिए । फणिन्द्रलाई उर्जामा यथावत् राख्दा मनाङेलाई भने अर्को मन्त्रालयमा सारेका हुन् ।

के भन्छन् मनाङे ?

‘वन मन्त्रालयमा जान्न, त्यो मन्त्रालय भाइहरूलाई दिएको भए हुने नि ! त्यही भएर राजीनामा दिएको हुँ । मैले राजीनामा पत्र सहयोगीमार्फत् मुख्यमन्त्रीकहाँ पठाइसकेँ । अब सरकारमा नजाने, अल्छी लाग्यो, कति खाने के ? रेष्ट गर्नुपर्छ अब । र, कुरा के हो भने वनमा बजेट छैन। मन्त्रालय हामीले हेर्न पनि पाउँदैन। यो त केन्द्रले हेर्ने हो । हामीले हेर्ने भनेको तितेपातीको झ्याङ हो। झण्डा हल्लाएर हिँडेर काम छैन। । यो मन्त्रालय त जुनियरले हेर्ने हो । तल्लो मनाङको भाइ मुनिन्द्रजंग गुरुङलाई मन्त्री देउ भनेको छु । नयाँ केटाहरुलाई अनुभव हुन्छ।’