पोखराका उद्योगी व्यवसायीले युवा नेतृत्व रुचाएका छन् । पोखरा उद्योग वाणिज्य संघको नेतृत्व होडमा उभिएका सबैभन्दा कान्छा उम्मेदवार सौगात थापालाई सम्मानजनक मत दिएर सदस्य पदमा विजयी बनाएका छन् ।

शनिबार भएको मतदानमा उद्योगी व्यवसायीले उत्साहपूर्वक सहभागी भएर सौगातलाई मत दिएका हुन् । संघको खुल्लातर्फ १० सदस्यमा १४ जना चुनावमा होमिएका थिए ।

त्यसमध्ये सौगातले तेस्रो स्थान प्राप्त गरे । कूल २ हजार २ सय ५१ मत खसेकोमा सौगातले १ हजार ४ सय ९४ मत ल्याए । यो पपुलर मत हो ।

यसअघिको कार्यसमितिमा मनोनित भएर कार्यसमितिमा प्रवेश गरेका सौगात यसपटक मतदाताबाटै अनुमोदित भएका हुन् । ‘नारामा युवा पटक पटक, नेतृत्वमा युवा यस पटक’ नारा लिएर सौगात चुनावमा होमिएका थिए ।

उनी अर्जुन पोखरेल टीमबाट चुनाव लडेका हुन् । चुनाव जितेपछि सौगातले आफ्नो जीतको श्रेय सबै मतदाता र शुभेच्छुकलाई जाने बताए ।

सौगातले संघको छविलाई उच्च बनाउन युवा नेतृत्वको आवश्यकता रहेको उल्लेख गरे । युवाहरुले नै प्रभावकारी काम गर्ने बताउँदै उनले युवा व्यवसायीका समस्यालाई सम्बोधन आफू लागिपर्ने बताए ।

उनले बुवा विन्दुकुमार थापाको बाटोलाई पछ्याउँदै संघमा अघि बढेको बताए । बुवा बिन्दुकुमार थापा अहिले गण्डकी प्रदेशका सामाजिक विकास मन्त्री छन् । बिन्दुकुमार थापा यस पोखरा उद्योग वाणिज्य संघका पूर्व अध्यक्ष हुन् ।