स्याङ्जामा संविधान दिवस विविध कार्यक्रम गरी तीन दिनसम्म मनाइने भएको छ । संविधानसभाबाट २०७२ साल असोज ३ गते नेपालको संविधान जारी भएकोमा हरेक वर्ष यस ऎतिहासिक दिनलाई हर्षोल्लासका साथ दिवसका रुपमा मनाइँदै आएको छ ।

जिल्ला प्रशासन कार्यालय स्याङ्जाले संविधान दिवस तथा राष्ट्रिय दिवस २०८१ भव्यतामा साथ तीन दिन मनाउन अपिल जारी गरेको छ ।

गत भदौ २८ गते भएको निर्णय अनुसार संविधान दिवस मनाउने मूल समारोह समितिबाट असोज २, ३ र ४ गते नेपालको संविधानका विषयमा केन्द्रीत रही तीनै दिन विशेष संवाद, परिसंवाद, सार्वजनिक सवारीसाधनमा राष्ट्रिय झण्डा फहराउन, आम नागरिकहरूलाई आआफ्नो घरको छत तथा बरण्डामा र सार्वजनिक निकायका कार्यालयहरुमा राष्ट्रिय झण्डा मर्यादापुर्वक राखी दीप प्रज्वलन गर्न सम्बन्धित सबै निकायमा अनुरोध गरिएको प्रशासन कार्यालय स्याङ्जाका प्रशासकीय अधिकृत संयोग भट्टराईले जानकारी दिए ।

उनका अनुसार, नेपाल पत्रकार महासंघ लगायत स्थानीय विद्युतीय तथा छापा सञ्चार र रेडियोको माध्यमबाट संविधान दिवस तथा राष्ट्रिय दिवससङ्ग सम्बन्धित कार्यक्रमहरु संचालन तथा समाचार सम्प्रेषण गर्न, गराउन अनुरोध गरिएको छ ।

संविधान दिवसका अवसरमा गरिने विविध कार्यक्रममध्ये असोज २ गते नेपालको संविधान दिवस तथा राष्ट्रिय दिवस र नेपालको राष्ट्रिय झण्डा लगायतको राष्ट्रभक्तिको विषयमा केन्द्रीत रही विशेष संवाद, परिसंवाद लगायत आम जानकारीका लागि सूचना सम्प्रेषण गर्ने, विद्यालय तथा कलेजमा कविता, वक्तृत्वकला, हाजिरीजवाफ प्रतियोगिता जस्ता कार्यक्रम रहेका छन् ।

सोही दिन बिहान ८ बजे सदरमुकाम स्थित सहिद चोकमा रक्तदान कार्यक्रम रहेको छ र रक्तदाताहरु साथै स्याङ्जा कारागारका कैदीबन्दीहरुलाई फलफूल वितरण गरिनेछ । जिल्ला स्थित सबै सरकारी निकाय, प्रतिष्ठान तथा सार्वजनिक संघसंस्था र आम नागरिकको सहभागितामा सहिद चोकमा साँझ ६ बजे दीप प्रज्वलन गरिने छ ।

त्यस्तै, उपयुक्त दिन पारी वृक्षरोपण कार्यक्रम तथा पुतलीबजार नगरपालिकाका जेष्ठ नागरिक, अशक्त अपांग नागरिकहरुलाई पालिकाभित्रका स्वास्थ्य संस्थाहरु मार्फत घरघरमा निशुल्क स्वास्थ्य परिक्षण तथा सामान्य उपचार संचालन गर्ने कार्यक्रम रहेका छन् ।

संविधान दिवस तथा राष्ट्रिय दिवस २०८१ मनाउने क्रममा असोज ३ गते बिहान ७ बजे जिल्ला प्रशासन कार्यालय स्याङ्जाको प्राङ्गणबाट प्रभातफेरी कार्यक्रम गर्ने र सहिद चोकमा पुगेर ज्ञात- अज्ञात सहिदहरुको आत्माको चीरशान्तिको कामनसहित उच्च सम्मानका साथ श्रद्धासुमन सलामी अर्पण गरिनेछ ।

यसैगरी, असोज ४ गते पुतलीबजार नगरपालिका स्थित चण्डीकालिका बहिरा आधारभूत विद्यालयका फरक क्षमता भएका विद्यार्थीहरुलाई हितकर शैक्षिक तथा खेलकुद सामाग्री वितरण गरिनेछ ।