कास्कीको भुर्जुङ्खोलाबाट कटिङ् ढुङ्गा बोकेर पोखरातर्फ आइरहेको ट्रक लामाचौर पानीट्याङ्कि, अमला बिसौनी चौतारो चोकमा मध्यरातमा दुर्घटना भएको छ ।

भुर्जुङखोलाबाट राती ३ बजे घार्मी हुँदै पोखरातर्फ झरेको अवस्थामा लोड ट्रक अनियन्त्रित भई आमा समूहको घरको पिल्लरमा ठोक्किन पुगी गोविन्द बस्नेतको घरको सटरमा ठोक्किन पुगेको थियो । ग १ ख ५२५८ नम्बरको ट्रकले सटरमा रहेको बसन्त खड्काको फ्रेश हाउसमा क्षति पुर्याएको छ ।

कटिङ ढुङ्गा चालक राजु गिरी स्वयंले ल्याएको र ट्रक ऋषिराम आचार्यको रहेको खुलेको छ । चालक गिरीको खुट्टा भाँचिएको र लामाचौर मेट्रो प्रहरीले तत्काल फिस्टेल अस्पतालमा लगेको थियो । प्रहरीले नियन्त्रणमा लिइएको ट्रक र ढुङ्गा थप अनुसन्धानका लागि एक्याप पठाइएको छ । कटपिस ढुङ्गा र दुर्घटनाको कारणको बारेमा थप अनुसन्धान भइरहेको प्रहरीले जनाएको छ ।

५ हजार पिस भन्दा बढी कटिङ ढुङ्गा पोखरा ल्याउँदा अकलाबाट सजिलो सडक हुँदाहुँदै बेसिचोक हुँदै घार्मी उक्लिएर लामाचौरतर्फ रातिको समयमा ल्याइनु रहस्यमय छ । चालक गिरीले एक्याप क्षेत्रबाट ढुङ्गा ल्याएको हुन सक्ने अनुमान गरिएको छ।