स्याङ्जाको आँधीखोला गाउँपालिका -५ मा अवस्थित आनन्द आश्रम ज्ञान केन्द्रद्वारा दुई प्रधानाध्यापकलाई सम्मान गरिएको छ ।

काजीमान हरिटीका माविका प्रधानाध्यापक ऋषिराम शर्मा र त्रिभुवन आदर्श नमूना माध्यमिक विद्यालयका प्रअ मुक्तिप्रसाद रेग्मीलाई तीन दशकदेखि निरन्तर उत्कृष्ट शैक्षिक र प्राज्ञिक कर्म गरेको भन्दै आनन्द प्रज्ञा सम्मानद्वारा सम्मान गरिएको हो ।

आनन्द आश्रम ज्ञान केन्द्रमा आयोजित विचार गोष्ठीमा प्राज्ञद्वयलाई आनन्द आश्रम प्रज्ञा सम्मानले दोसल्ला ओढाएर सम्मानपत्रले सम्मान गरिएको हो । काजीमान हरिटीका माध्यमिक विद्यालयका प्रधानाध्यापक ऋषिराम शर्मा माध्यमिक तह प्रथम श्रेणीका शिक्षक विगतमा स्रोत व्यक्ति र प्रशिक्षकको भूमिकामा रही स्याङ्जा जिल्लाको शैक्षिक उन्नयनमा अहम् भूमिका खेल्नुभएको छ ।

यस्तै, त्रिभुवन आदर्श नमूना माविका प्रअ मुक्तिप्रसाद रेग्मी गण्डकी प्रदेश परीक्षा समितिको सदस्य हुनुहुन्छ । एउटा सामान्य रूपमा चलिरहेको त्रिआ माविलाई जिल्लाकै नमुना विद्यालय बनाएर हजारौं विद्यार्थीसहितको रूपान्तरित उदाहरणीय विद्यालयमा परिणत गर्ने सक्षम नेतृत्वका रूपमा रेग्मीलाई चिनिने गरिएको छ ।

पूर्वमन्त्री त्रिलोचन ढकालले जिल्लामै साहित्यिक गतिविधि शून्य भइरहेको बेलामा बुबा आनन्द ढकालको प्राज्ञिक योगदानलाई जीवित बनाउने गरी आनन्द आश्रमलाई साहित्यिक र प्राज्ञिक जमघटको थलो बनाउनु भएको हो । आनन्द आश्रम ज्ञान केन्द्रले मासिक साहित्यिक कार्यक्रम समेत गर्दै आएको छ ।