फेदीखोला गाउँपालिकाको आयोजनामा २ दिने वन उद्यम स्थापना सम्बन्धी अभिमुखीकरण एवं कार्यशाला गोष्ठी सम्पन्न भएको छ ।

स्थानीय वन परिषदको सचिवालय फेदीखोलामा सूचीकृत सामुदायिक वन उपभोक्ता समितिका पदाधिकारी तथा प्रतिनिधिहरुलाई समेटेर २ दिने वन उद्यम स्थापना सम्बन्धी अभिमुखीकरण एवं कार्यशाला गोष्ठी सञ्चालन गरिएको हो ।

सामुदायिक वन क्षेत्रमा पाइने वन पैदावार, कु काठ तथा गैह्र काठजन्य वन पैदावारमा आधारित सामुदायिक वन उपभोक्ता समितिका सदस्यहरूको सहभागितामा सहकारी स्थापना गरी वन उद्यम स्थापना गर्ने, रोजगार सृजना गर्दै आर्थिक उपार्जनमा सहजै जोड्ने हेतुले कार्यक्रम संचालन गरिएको फेदीखोला गाउँपालिकाका अध्यक्ष घनश्याम सुवेदीले बताए ।

कार्यक्रममा गाउँपालिकाका उपाध्यक्ष देऊ कुमारी गुरुङ, वडा अध्यक्ष ख्याम नारायण पौडेल लगायतको उपस्थिति रहेको थियो । फेदीखोला गाउँपालिकाका अध्यक्ष तथा वन परिषदका अध्यक्ष घनश्याम सुवेदीको अध्यक्षतामा भएको कार्यक्रममा ग्रीन फाउन्डेसन नेपाल, काठमाडौंका वासुदेव घिमिरेले कार्यक्रमको सहजीकरण गरेका थिए । ग्रीन फाउन्डेसन नेपाल, काठमाडौंको प्राविधिक सहयोग रहेको कार्यक्रम हिजो र आज गरी २ दिन संचालन भएको थियो ।