नेपाल अधिराज्यभर बसोबास गर्ने गर्ग गोत्रका सिंह रोकाहा क्षेत्रीहरुको ऎतिहासिक पूजा सम्पन्न भएको छ । उक्त पूजामा अर्जुनचौपारी गाउँपालिकाले नि:शुल्क स्वास्थ्य सेवा प्रदान गरेको छ ।

पुतलीबजार नगरपालिका -१३ कुमालटारीमा रोकाहा बन्धुहरुको निशान तथा कुल पूजामा उपस्थित सर्वसाधारण तथा भक्तजनहरुको स्वास्थ्य समेतलाई ख्याल राख्दै अर्जुनचौपारीले नि:शुल्क स्वास्थ्य सहायता कक्षा संचालन गरि स्वास्थ्य जाँच, औषधि उपचारको व्यवस्था गरेको थियो ।

पूजा अवधिभर गाउँपालिकाले पिउनको लागि नि:शुल्क पानीको समेत व्यवस्था गरेको थियो ।

मङ्सिर २१ गते निशान पूजा र २२ गते कुल पूजा गरि दुई दिनसम्म गरिएको पूजामा देशभरका हजारौं रोकाहाबन्धुहरु र भक्तजनहरु उपस्थित रहेका थिए ।

विशेषगरी रोकाहा निशानलाई भाकल गर्ने र भाकल पूरा भएपश्चात निशान पूजाको दिन बोकाहरुको बलि चढाउने परम्परा रहेको छ ।

हरेक ५-५ वर्षमा देशभरका रोकाहाहरुको निशान तथा कुलपूजा यहि स्थानमा हुँदै आएको छ ।

यस्तै, अर्जुनचौपारी गाउँपालिका -१ सिमलचौरमा मङ्सिर २१ र २२ गते भएको आत्रीय गोत्रका बगाले थापाहरुको निशान तथा कुलपूजामा पनि गाउँपालिकाले नि:शुल्क स्वास्थ्य सहायता कक्षा संचालन गरि स्वास्थ्य जाँच, औषधि उपचारको व्यवस्था गरेको थियो ।