पोखरामा मंगलबार साँझ सवारी दुर्घटना हुँदा एक जनाको मृत्यु भएको छ ।

दुर्घटनाबाट गम्भिर घाइते पोखरा वडा नं. ३२, लामेआहालका डम्बर बहादुर पुनको उपचारका क्रममा ज्यान गएको हो ।

लामेआहालमा पृथ्वी राजमार्गबाट भित्री सडकतर्फ जान लागेका पुन सवार ग२१प ६४७४ नम्बरको स्कुटरलाई पोखराबाट दमौलीतर्फ जाँदै गरेको बाप००६ख ५४४३ नम्बरको बसले ठक्कर दिएको थियो । 

साँझ सवा ५ बजेतिर भएको दुर्घटनामा गम्भीर घाइते भपुनको पोखरा स्वास्थ्य विज्ञान प्रतिष्ठानमा उपचारको क्रममा साँझ पौने ७ बजे ज्यान गएको प्रहरीले जनाएको छ ।

जिल्ला प्रहरी कार्यालय कास्कीका अनुसार बसको ठक्करबाट स्कुटर पूर्णरुपमा क्षति भएको छ । प्रहरीले बस र बस चालक खोटाङका रमेश बिकलाई नियन्त्रणमा लिएर अनुसन्धान गरिरहेको जनाएको छ ।

गएराति मात्रै पोखराको बुढीबजारमा टिप्परको ठक्करबाट मोटरसाइकल चालकको मृत्यु भएको थियो । पोखरा वडा नं. ३३, बागमाराका २८ वर्षीय अशोक लामिछानेको ज्यान गएको हो ।