सामाजिक अध्ययन मञ्च, कास्कीको आयोजनामा सामाजिक अध्ययन विषयको परिमार्जित पाठ्यक्रम सम्बन्धमा एक दिने गोष्ठी तथा कार्यशाला सम्पन्न भएको छ |

कार्यशाला गोष्ठीलाई पाठ्यक्रम विकास केन्द्रकी सामाजिक विषयकी पाठ्यक्रम अधिकृत सरस्वती भट्टराइले सहजिकरण गरेका थिए ।

कास्कीबाट परिमार्जन कार्यदलका सदस्य तथा विषयविज्ञ रहनुभएका मंचका निवर्तमान र वर्तमान अध्यक्षद्वय दिनेश अर्याल र गोविन्द काफ्लेको उपस्थितिमा एक दिने गोष्ठी तथा कार्यशालामा कास्कीबाट सुझाव संकलन कार्य सम्पन्न भएको छ |

सामाजिक विषयको परिमार्जित पाठ्यक्रमको सुझाव संकलन कार्यमा कास्कीका लेखक एवं शिक्षकहरू सूर्य गुरुङ, राजिव उपाध्याय, टेकनाथ पौडेल, मञ्चकी उपाध्यक्ष नारायणी शर्मा गौतमसँगै सामुदायिक र संस्थागत विद्यालयका ६० जना शिक्षकहरुको उपस्थिति थियो |

पाठ्यक्रम परिमार्जनमा सामाजिक अध्यनलाई सरलीकृत गर्दै विद्यार्थीको उमेर क्षमता र वर्तमान आवश्यकता अनुसार आधारभूत विषयवस्तुहरु मात्र समेटी जीवनोपयोगी सीप र नैतिक शिक्षालाई आधारभूत तहबाटै माध्यामिक तहसम्मै समावेश गर्नुपर्ने सुझाव दिइयो |

साथै, सामाजिक अध्ययनले भविष्यमा देशको लागि काम लाग्ने जनशक्ति उत्पादन, मौलिक पहिचान र स्थानीयकरणलाई संरक्षण गरी सोचमा विश्वव्यापीकरण ल्याउन सक्ने विषयवस्तु समेटिनुपर्ने कुरामा जोड दिइयो |

सोहि अवसरमा १६ जना सामाजिक अध्यापन गर्ने शिक्षकले अध्ययन मञ्च, कास्कीको आजीवन सदस्यता लिएको मञ्चका सचिव तिलकप्रसाद काफ्लेले जानकारी दिए ।