गण्डकी प्रदेश स्तरीय प्रधानमन्त्री कप महिला टी–२० क्रीकेट छनौट प्रतियोगितामा स्याङ्जा विजयी भएको छ । बिहीबार सम्पन्न फाइनल खेलमा घरेलु टोलि कास्कीलाई ८ विकेटले पराजित गर्दै स्याङ्जा विजयी बनेको हो ।

पोखरा अन्तर्राष्ट्रिय क्रीकेट स्टेडियममा भएको फाइनल खेलमा स्याङ्जाले पाएको ११४ रनको लक्ष्य १९.३ ओभरमा २ विकेटको क्षतिमा पूरा गरेको थियो ।

स्याङ्जाका लागि श्रेया शाहले ४५ रन बनाएकी थिइन् । शाहले ५६ बलमा चार चौका प्रहार गरिन् । उनी विपक्षी खेलाडीको बलमा बोल्ड भइन् । नटआउट रहँदै सलिना सेनले ४९ बलमा ३९ रन जोडेकी थिइन् । उनले चार चौका प्रहार गरेकी थिइन् । यस्तै, एक चौका प्रहार गर्दै निरु जिटि तीन बलमा ६ रन ल्याएर नटआउट रहिन् । स्याङ्जाका लागि जेनिशा खत्रीले ४ रन जोडेकी थिइन् ।

स्याङ्जाबाट यस प्रतियोगितामा फाइनल खेलको म्यान अफ द म्याच श्रेया शाह बनेकी थिइन् भने अपेक्षा बुढाथोकी उत्कृष्ट बलर बनिन् ।

विजेता टिम तथा खेलाडीलाई प्रदेश खेलकुदका कार्यकारी सदस्य ऋषिराम गौतम, प्रदेश क्रीकेट संघका उपाध्यक्ष प्रकाश पौडेल, कोषाध्यक्ष दिवाकर थापा, सदस्य विद्या भट्टराईलगायतले पुरस्कार वितरण गरेका थिए ।

गण्डकी प्रादेशिक क्रीकेट संघको आयोजना पुस २२ गतेदेखि पोखरा रंगशालामा सुरु भएको प्रतियोगितामा प्रदेशका ४ टोलि स्याङ्जा, कास्की, पर्वत र नवलपुर क्रीकेट संघको सहभागिता रहेको थियो । प्रधानमन्त्री कप महिला राष्ट्रिय क्रीकेट प्रतियोगिता –२०८१ यही माघ १ गतेदेखि धनगढीमा हुँदैछ ।