पोखरा । ५३ वर्ष अघि २०२८ सालमा तत्कालीन राजा श्री ५ वीरेन्द्रको शुभ राज्यभिषेकका अवसरमा पोखराको अमरसिंह चोक र औद्योगिक क्षेत्रको बीचमा निर्माण गरिएको ऐतिहासिक ‘पोखरा गेट’ भत्काइएको छ ।

पृथ्वी राजमार्ग अन्तर्गत पोखरा–मुग्लिन सडकखण्ड विस्तारका क्रममा गेट हटाएको हो । गत पुस ३ गते दिउँसो र राति गेट भत्काउन लागेपछि राप्रपा र केही स्थानीयले समेत त्यसको विरोध गरी एक्साभेटर फर्काएको थियो ।

पोखराका मेयर धनराज आचार्य बाहिर भएका कारण सहमति जुट्न नसक्दा तत्कालका लागि उक्त गेट भत्काउन रोकिएको थियो । मेयर आचार्य फर्किसकेपछि सहमतिका लागि सर्वदलिय बैठक बसेको बताइन्छ ।

विकास निर्माणका कार्यमा अवरोध नगर्ने साझा समझदारीका साथ सुरक्षा निकाय, महानगर प्रहरी र निर्माण कम्पनीको सहकार्यमा यो कार्य सम्पन्न भएको महानगरको दाबी छ ।

तर, राप्रपाले भने सर्वदलीय बैठकमा कुनै निर्णय नभएको बताएको छ । पुस २८ गते राति गेट भत्काइएपछि राप्रपाका केन्द्रीय सदस्य अरुण गिरीले सर्वदलीय बैठकमा दलहरुले आफ्नो एजेण्डा प्रस्तुत गरेको र सहमति लेखौं भन्दा पनि नलेखेको खुलाएका छन् ।

उनले भने – ‘मेयरले सर्वदलीय बैठक डाके । सबै दलहरुले एजेण्डामा आफ्ना धारणा राखेका हुन् । तर केही निर्णय भएन । सहमतिमा केही निर्णय त लेखौं भनियो । तर, निर्णय केहि लेखिएन । पछि बसौंला, छलफल गरौंला भनेर बैठक सकिएको हो । मध्यराति इतिहास मेटाए ।’

पुनर्निर्माणको सहमति गरौं, जनस्तरबाटै मापदण्ड अनुरुपको पुनर्निर्माण गर्छौँ भन्दा पनि नमान्ने मेयरको नियत खराब रहेको उनको भनाई छ ।राप्रपालगायत स्थानीय एकता क्लबले मुलुकको ऐतिहासिक सम्पदा जोगाउनुपर्ने भन्दै आएका थिए ।

केन्द्रीय सदस्य गिरीले पोखरा गेट पोखराको मुख्य भाग प्रवेश गर्ने क्रममा मुख्य गेट पनि भएकाले पुरानै शैलीमा ऐतिहासिक कला समेटेर मापदण्ड अनुरुप पुनर्निर्माण हुनुपर्ने र नगरेमा जस्तोसुकै आन्दोलन गर्न पछि नहट्ने प्रतिक्रिया दिएका छन् । पोखरा अन्तर्राष्ट्रिय विमानस्थलमा अवतरणपछि स्वागत गेट रहेकोले पनि महत्वपूर्ण रहेको उनी बताउँछन् ।

राजा वीरेन्द्रको शुभराज्यभिषेक अवसरमा पृथ्वी राजमार्ग अन्तर्गत पोखरामा स्वागतार्थ निकै कलात्मक ढंगले पक्की गेट निर्माण गरिएको थियो । गेटको माथिल्लो भाग सबैभन्दा महत्वपूर्ण रहेको छ । जसमा बुद्ध र शिवको मूर्तिबीचमा श्रीपेच जडित छ ।