पोखरा। टाइगर ग्रुप अफ नेपालको आयोजनामा माघ दोस्रो सातादेखि पोखरा रंगशालामा हुने टाइकर कप भलिबल प्रतियोगितामा महिला र पुरुषतर्फ ६/६ टिमले भाग लिने भएका छन् ।

एनसेल पाँचौं टाइगर कप राष्ट्रिय तथा अन्तर्राष्ट्रिय क्लब महिला तथा पुरुष भलिबल प्रतियोगिता यस क्षेत्रमा हुने सबैभन्दा ठूलो राशिको भलिबल प्रतियोगिता हो । प्रतियोगिता संयोजक रामकृष्ण ज्ञवालीले मंंगलबार विज्ञप्ति जारी गर्दै टिमबारे जानकारी दिएका हुन् ।

उनका अनुसार पुरुषतर्फ हेल्प नेपाल स्पोर्टस् क्लब, गण्डकी प्रदेश भलिबल संघ, श्रीलंकन भलिबल टिम, नेपाल पुलिस क्लब, त्रिभुवन आर्मी क्लब र नेपाल एपिएफ क्लबले भाग लिने छन् ।

महिलातर्फ नेपाल एपिएफ क्लब, टिपटप न्यू डायमण्ड स्पोर्टस् क्लब, त्रिभुवन आर्मी क्लब, नेपाल पुलिस क्लब, युनाइटेड प्यासन भलिबल क्लब थाइल्याण्ड र आयोजकको टिमले भाग लिने छन् । आयोजकले महिलातर्फ पहिलोपल्ट टिम उतार्न लागेको हो ।

१२–१९ माघसम्म पोखरा रंगशालाको भलिबल कोर्टमा संचालन हुने प्रतियोगितामा पुरुष तथा महिलातर्फ विजेताले ५ लाख ८५ हजार ५५५ रुपैयाँ, उपविजेताले २ लाख ८५ हजार ५५५ र तेस्रोले १ लाख ८५ हजार ५५५ साथमा ट्रफी, मेडल र प्रमाणपत्र प्राप्त गर्नेछन् ।

सर्वोत्कृष्ट हुने खेलाडी (महिला/पुरुष दुवै) ले जनही २५ हजार ७७७ प्राप्त गर्ने छन् । विधागततर्फ उत्कृष्ट सर्भर, सेटर, ब्लकर, लिबेरो, स्पाइकर र प्रशिक्षकले जनही १० हजार ५५ रुपैयाँ साथमा ट्रफी र प्रमाणपत्र प्राप्त गर्ने छन् ।

प्रतियोगिताको तयारी तीव्र पारिएको आयोजक क्लब अध्यक्ष नारायणप्रसाद शर्मा बताउँछन् ।

गत चौंथो संस्करणको उपाधि पुरुषतर्फ हेल्प नेपाल र महिलातर्फ एपिएफले जितेका थिए । हेल्प नेपालले घरेलु टिम गण्डकीलाई ३–१ को सेटमा र महिलातर्फ एपिएफले न्यू डायमण्डलाई ३–० को सोझो सेटमा हराउँदै उपाधि जितेको थियो ।