भूकम्पले घर भत्किएर अस्थायी टहरामा बस्दै आएका  सिरानचोक गाउँपालिका–४ माझगाउँका पिताम्वर पोखरेलको यस पटक नयाँ घरमा दशै मनाउने ठुलो रहर थियो । रहर पुरा गर्न उनले धमाधम घर पुननिर्माण पनि गरिरहेका थिए । तर गाउँ नजिकैको खहरे खोलामा पहिरो गएपछि उनको घर पुननिर्माणको काम रोकिएको छ ।

पहिरोका कारण सडक अवरुद्ध भएसँगै निर्माण सामाग्री ढुवानी हुन सकेको छैन । ‘गएको असार १३ गते पहिरो गयो,’ उनले भने,  ‘पहिरोले सडक सबै पुरिएको छ, गाडी नआएर सामान ल्याउन सकेको छैन ।’ पोखरेलले गत जेठमा घर बनाउन शुरु गरेका थिए । घरको गाह्रो लगाउने काम हुदै थियो । तर निर्माण सामग्री अभावमा काम रोकिएको छ ।

‘बल्ल बल्ल काम गर्ने मजदुर पाइएको थियो तर अहिले सामान ल्याउन नसकेर काम नै रोकिएको छ,’ उनले भने । पहिरो हटाउनका लागी वडा अध्यक्षलाइ वारम्वार आग्रह गरेपनि वेवास्ता गरेको उनको गुनासो छ । वडा अध्यक्ष मात्र होइन उनले गाउँपालिकामा पनि खवर गरेका थिए । तर गाउँपालिकाले पनि  पहिरो हटाउन कुनै चासो नदिएको उनको आरोप छ । ‘सरकार चाडै घर बना भन्छ, इन्जिनियर आएर पटक पटक कराइरहन्छ तर पहिरोले सामान ल्याउन नपाएर घर अलपत्र परेको समस्या कसैले बुझ्दैन,’ पोखरेलले गुनासो पोखे । अस्थायी टहरामा बस्दा समस्या भएको उनले बताए ।

‘सधै कति अस्थायी टहरामा दशै मनाउने भनेर यस पटक चाही नयाँ घरमा मनाउनुप¥यो भनेको पहिरोले सामान ल्याउन नपाएर काम नै रोकियो,’ उनले भने । अस्थायी टहरामा सर्पको डर सँगै बर्षातमा पानी चुहिएर समस्या हुने गरेको उनले बताए । उनी मात्र होइन सोही ठाउँका बिष्णु पोखरेलको पीडा पनि उस्तै छ । अहिले सम्म घर पुननिर्माण भइसक्नुपर्ने भएपनि पहिरोले काम अवरुद्ध भएको उनी बताउछन् । ‘वालुवा, सिमेन्ट र जस्ता ल्याउनुपर्ने छ, तर पहिरोले बाटो बन्द भएर सामान ल्याउन पाएको छैन,’ उनले भने । सामान अभावमा काम पनि ठप्प भएको उनले बताए ।

माझगाउँका भूकम्प पीडित मात्र होइन पहिरोका कारण सोही सडक हुदै जाने थामपाटा, आरुवोटे, फिरफिरे, जैसिथोक, सालबोट लगायतका भूकम्प पीडितहरुको पुननिर्माणको काम रोकिएको छ । पहिरोले बाटो अवरुद्ध भएर सामान ढुवानी हुन नसक्दा नीजि आवास पुननिर्माणको काम प्रभावित बनेको हो । नीजि आवास पुननिर्माण प्रभावित हुदा यस पटकको दशै पनि अस्थायी टहरामा मनाउन सो क्षेत्रका पीडितहरु बाध्य हुने भएका छन् ।